1 րոպեի ընթերցում
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Անգլիայում մեկնարկեց հզոր կազմ հավաքած «Այլ օֆ Մեն» միջազգային մրցաշարը, որին մասնակցում են աշխարհի չեմպիոն Մագնուս Կարլսենը, աշխարհի նախկին չեմպիոններ Վլադիմիր Կրամնիկը և Վիշվանաթան Անանդը, հանրահայտ գրոսմայստերներ Ֆաբիանո Կարուանան, Հիկարու Նակամուրան, Բորիս Գելֆանդը:
«Արմենպրես»-ի փոխանցմամբ` մրցաշարի մասնակիցների թվում են Հայաստանի հավաքականի անդամներ Գաբրիել Սարգսյանը և Սերգեյ Մովսեսյանը: Ընդհանուր առմամբ, մրցաշարին մասնակցում են 160 շախմատիստ, այդ թվում՝ 67 գրոսմայստեր:
Տուրի կենտրոնական պարտիայում Ֆաբիանո Կարուանան հաղթեց Վլադիմիր Կրամնիկին: Հաղթանակ տարավ նաև Մագնուս Կարլսենը: Մրցաշարում հաղթանակով մեկնարկեց նաև Գաբրիել Սարգսյանը, իսկ Սերգեյ Մովսեսյանը ոչ-ոքի խաղաց: