ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ: «Լրագրողների ազատության և անվտանգության» ինստիտուտը քննադատել է Ադրբեջանի իշխանություններին և կոչ արել վերջ տալ ԶԼՄ-ների նկատմամբ իրականացվող քրեական հետապնդումների պրակտիկային:
Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:
«Լրագրողների ազատության և անվտանգության» ինստիտուտը անդրադարձել է Ադրբեջանի իշխանությունների կողմից Ադրբեջանում փոքրիշատե կենսունակություն ցուցաբերող անկախ լրատվական գործակալություններից «Թուրան»-ի նկատմամբ քաղաքական մոտիվներով իրականացվող քրեական հետապնդմանը:
Ինստիտուտը Ադրբեջանի իշխանություներից պահանջել է դադարեցնել «Թուրան» լրատվական գործակալության նկատմամբ իրականացվող «հարկերից խուսափելու» շինծու մեղադրանքով քրեական հետապնդումը և գործակալության ոչնչացմանն ուղղված անօրինական գործողությունները:
«Հստակ երևում է. Ադրբեջանի իշխանությունները վերջին 5 տարում առաջին անգամը չէ, որ երկրում իրավիճակն ամբողջովին հսկելու նպատակով ԶԼՄ-ների և ՀԿ-ների նկատամբ ճնշումներ իրականացնելու նպատակով օգտագործում են ֆիսկալ մեխանիզմներ: Հայտնի է, որ անկախ մամուլի ներկայացուցիչներ «Խուրալ», «Ազաատություն» թերթերի, Ազատ Եվրոպա/ Ազատություն ռադիոկայանի Ադրբեջանական ծառայության, Meydan TV, Kanal 13-ի և այլ ԶԼՄ-ների նկատմամբ ճնշման նպատակով նախկինում կրառվել է «հարկերից խուսափելու» շինծու մեղադրանքը»,- ասված է «Լրագրողների ազատության և անվտանգության ինստիտուտի հայտարարության մեջ:
Ինստիտուտի հայտարարության մեջ նշվում է, որ այս պրակտիկան կիրառվել է նաև իրավունքների պաշտպանությամբ զբաղվող կազմակերպությունների նկատմամբ, ինչի հետևանքով այդ կազմակերպությունները մասամբ կամ աբողջովին դադարեցրել են իրենց գործունեությունը:
«Լրագրողների ազատության և անվտանգության» ինստիտուտը Ադրբեջանի իշխանություններին, ինչպես ԶԼՄ-ներին և ՀԿ-ներին շինծու մեղադրանքներով քրեական հետապնդման ենթարկելու պրակտիկայից հրաժարվելու այնպես էլ ձերբակալված լրատրողներին ազատ արձակելու կոչ է արել:
Ինստիտուտը Ադրբեջանի իշխանություններից պահանջել է երկրում ստեղծել այնպիսի նպաստավոր պայմաններ, որ ԶԼՄ-ներն ու ՀԿ-ները կարողանան իրականացնել իրենց ստանձնած գործառույթները:
ԱՄՆ-ի, Եվրամիության և միջազգային բազմաթիվ կազմակերպությունների Ադրբեջանում ժողովրդավարություն հաստատելու և բաց կառավարում իրականացնելու Ալիևին ուղղված բազմաթիվ հորդորներն անցնում են ապարդյուն և Ալիևյան վարչակարգը շարունակում է իր հակաժողովրդավարական կառավարումը:
Ընդիմադիր մամուլի ներկայացուցիչ Խալիգ Բահադըրի խոսքով` ընդդիմադիր մամուլը սովետական շրջանում և Ա. Մութալիբովի նախագահության շրջանում նույնպես ունեցել է դժվարություններ, սակայն այդ դժվարությունները շատ փոքր կարելի է համարել Ալիևյան ընտանիքի կառավարման շրջանում խոսքի ազատության նկատմամբ իրականացված քայլերի համեմատ:
Խալիգ Բահադըրի փոխանցմամբ` Ադրբեջանում մամուլի ազատության լուրջ սահմանափակումներն սկսվել են Հեյդար Ալիևեի շրջանից: Այն ԶԼՄ-ները որոնք տպագրել են օբյեկտիվ ճշմարտություններ արժանացել են Հեյդար Ալիևի թշնամանքին:
Ինչ վերաբերում է Իլհամ Ալիևի կառավարման շրջանին, ապա այս շրջանը նույնպես անկախ մամուլի համար շարունակական ճնշումների և հալածանքների ժամանակաշրջան է եղել:
Իլհամ Ալիևի կառավարման ժամանակաշրջանում ևս անկախ մամուլը և դրա ներկայացուցիչները շարունակաբար ենթարկվել են հոգեբանական, ֆիզիկական, տնտեսական, քաղաքական հետապնդումների և ճնշումների:
Կոռուպցիայով և ճնշումներով լի Ադրբեջանում ճշմարտությունը վեր հանող լրագրողները, լրատվամիջոցները մշտապես ենթարկվել են կառավարության ճնշումներին, եղել են զանգվածային ձերբակալություններ:
2016-ի տվյալներով Ադրբեջանը համարվում է լրագրողների նկատմամբ աշխարհում ամենաշատ գրաքննություն իրականացնող երկրներից մեկը՝ զբաղեցնելով 5-րդ տեղը աշխարհի ամենագրաքննվող տասըերկների շարքում: