Թուրքիայում ձերբակալված ընդդիմադիր պատգամավորն ազատ է արձակվել

ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: Թուրքիայի ընդդիմաիր քրդամետ Ժողովուրդների դեմոկրատական կուսակցության (HDP) պատգամավոր Այշե Աջար Բաշարանը ազատ է արձակվել:

Այս մասին, ինչպես հաղորդում է «Արմենպրես»-ը, այս մասին հայտնում է թուրքական Diken պարբերականը:

Այշե Բաշարանը օրեր առաջ ձերբակալվել էր Բաթմանի օդանավակայանում, երբ ցանկացել էր մեկնել Անկարա:

Բաշարանի նկատմամբ ձերբակալման որոշումը կայացվել էր հուլիսի 18-ին` դատական նիստին չներկայանալու պատճառով:

Հուլիսի 29-ին Թուրքիայի քրդամետ Ժողովուրդների դեմոկրատական կուսակցության մեկ այլ պատգամավոր Սաադեթ Բեջերիքլին Բաթմանի օդանավակայանում ինքնաթիռից իջնելուց անմիջապես հետո ձերբակալվել է:

Բեջերիքլիին ձերբակալելու մասին նույնպես որոշում էր կայացվել դեռևս հուլիսի 18-ին: Նա մեղադրվում է «հանցախմբի քարոզչություն» իրականացնելու մեջ:

Թուրքիայի բանտերում շարունակում են կալանավորված մնալ քրդամետ կուսակցության ութ պատգամավոր: Նրանց շարքում է նաև կուսակցության համանախագահՍելահաթթին Դեմիրթաշը: Կուսակցության մյուս համանախագահ Ֆիգեն Յուքսեքդաղը և պատգամավոր Նուրսել Այդողանը զրկվել են պատգամավորական մանդատից:

Նրանց դեմ հետաքննություն է իրականացվում «զինված ահաբեկչական խմբավորման անդամ լինելու, հանցագործություն կատարելուն դրդելու և ահաբեկչական խմբավորման քարոզչությունն իրականացնելու» մեղադրանքներով: