1 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Ջերմուկում մեկնարկում է օլիմպիական չեմպիոն Կարեն Ասրյանի հիշատակին նվիրված 10-րդ միջազգային բաց մրցաշարը:
«Արմենպրես»-ի հաղորդմամբ` մրցաշարի փակման հանդիսավոր արարողությունը տեղի կունենա հունիսի 29-ին՝ Ջերմուկ քաղաքի «Հայաթ Փլեյս» հյուրանոցում: Մրցաշարին այս տարի մասնակցում են 12 երկրների՝ Հայաստանի, Ռուսաստանի, Ֆրանսիայի, Հնդկաստանի, Ուկրաինայի, Թուրքիայի, Վրաստանի, Իրանի, Իսրայելի, Լատվիայի, Ղազախստանի և Բելառուսի շուրջ 80 պատվիրակներ: Այս տարի մրցաշարը չափազանց ուժեղ կազմ ունի: Մասնակիցների մեջ են 23 գրոսմայստեր, ինչի շնորհիվ մրցաշարի պատանի մասնակիցները հնարավորություն են ստացել լրացնելու գրոսմայստերի նորմա: Մրցաշարը մեկնարկում է հունիսի 20-ին և կավարտվի 29-ին:
Կարեն Ասրյանը նորանկախ Հայաստանի ուժեղագույն շախմատիստներից մեկն էր: Նա ոսկե տառերով է գրել իր անունը հայկական և համաշխարհային շախմատի պատմության մեջ: Նա Հայաստանի եռակի չեմպիոն, Հայաստանի ազգային հավաքականի կազմում Եվրոպայի և Համաշխարհային օլիմպիադայի չեմպիոն է: