Զինված խմբի գործողություններն ուղղված էին պետականության դեմ. Գառնիկ Իսագուլյան

ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Զինված խմբի գործողությունները ուղղված են եղել բացառապես Հայաստանի պետականության դեմ: «Արմենպրես»-ի հաղորդմամբ՝ օգոստոսի 17-ին լրագրողների հետ հանդիպման ժամանակ զինված խմբի կողմից ՀՀ ոստիկանության պարեկապահակային ծառայության գունդը գրավելու, մարդկանց պատանդ պահելու վերաբերյալ նման տեսակետ հայտնեց «Ազգային անվտանգություն» կուսակցության նախագահ Գառնիկ Իսագուլյանը:

«Նրանք փորձեցին վարկաբեկել բանակը, ոստիկանությունը, ազգային անվտանգության ծառայությունը և ընդհանրապես այն բոլոր ինստիտուտները, որոնց վրա հիմնված է պետականությունը: Նրանց առաջին օրերին առաջ քաշած լոզունգները՝ սոցիալական արդարության, հավասարության վերաբերյալ, դրանք լոկ լոզունգներ էին, որպեսզի կարողանան հասարակության որոշակի խավին օգտագործել բացառապես մեկ նպատակով, այն է` իշխանություն վերցնելը»,- ընդգծեց Իսագուլյանը:

Անդրադառնալով գնդապետ Արթուր Վանոյանի սպանությանը՝ Իսագուլյան նշեց, որ զինված խումբը 3-4 ժամ թույլ չի տվել, որպեսզի գնդապետին բժշկական օգնություն տրամադրվի, որի հետևանքով նա մահացել է:

Նրա խոսքով՝ զինված խմբի 31 անդամներից 7-ն ընդհանրապես զենք չէին տեսել նախկինում, իսկ շատերը ընդհանրապես տեղյակ չեն եղել, թե հուլիսի 17-ի գիշերն ինչ գործողություններ են կատարվելու:

«Գրոհը զինված բաժանմունքի վրա ենթադրում էր դիմադրություն և ովքեր պետք է դառնային առաջին զոհերը, բնականաբար, նրանք ովքեր կյանքում զենք տեսած չեն եղել: Անպայման նախատեսված էր, որ այս գործողությունների ժամանակ լինելու են զոհեր իրենցից, և այդ զոհերի արյան վրա իրենք փորձելու են շահարկել և մեծ զանգված հանել Երևանի փողոցներ: Սակայն, նրանց այս մտահղացումը իրականացնել չհաջողվեց և բավականին լուրջ հարված հասցրեց նրանց հետագա պլաններին»,- ասաց Իսագուլյանը:

Լեռնային Ղարաբաղի հողերի հանձման վերաբերյալ խոսակցությունները Իսագուլյանի դիտարկմամբ անհիմն են և իրականությանը չեն համապատասխանում:

«Ես ընդամենը 10 օր առաջ Լեռնային Ղարաբաղի Հանրապետության նախագահի հետ եղել եմ Իշխանաձորում: Այնտեղ քաղաքացիներին բաժանվել է 18 բնակարան: Բացի դրանից, մենք եղել ենք ԼՂՀ-ի բոլոր համայնքներում: Այդ տարածքներում ԼՂՀ նախագահը տվել է հանձնարարականներ դպրոցներ, մանկապարտեզներ կառուցելու վերաբերյալ:

Վարչապետ Արայիկ Հարությունյանի հետ եղել ենք Հյուսիսային շրջաններում, որտեղ նույնպես բնակարաններ են բաժանվել և տրվել են հանձնարարականներ: Դրանք այն շրջաններն են, որոնց հանձնման մասին խոսում են որոշ քաղաքական գործիչները: Ո'չ Հայաստանի Հանրապետության Նախագահ Սերժ Սարգսյանը, ո'չ Լեռնային Ղարաբաղի Նախագահ Բակո Սահակյանը չեն պատրաստվում որևէ մեկին հող հանձնել»,- շեշտեց Իսագուլյանը: