Հայաստանի առաջին օմբուդսմենը երկրում իրավիճակի կայունության բանալին տեսնում է իշխանությունների ձեռքում

ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ: Հայաստանում հուլիսյան իրադարձություններից հետո իրավիճակի կայունության պահպանման բանալին իշխանությունների ձեռքում է: «Արմենպրես»-ի հաղորդմամբ, «Ընդդեմ իրավական կամայականության» ՀԿ գործադիր տնօրեն, Մարդու իրավունքների առաջին պաշտպան Լարիսա Ալավերդյանը խոսել է «Սասնա ծռեր» զինված խմբի` զենքը վայր դնելուց հետո ստեղծված քաղաքական իրավիճակի մասին նշեց, որ բանակցության գործընթացում միջնորդությունները դրական արդյունք տվեցին: Նրա խոսքով՝ անպայման գտնվեն այնպիսիները, որոնք էլի կփորձեն գործել օրենքով արգելված, բայց պատմության մեջ հաճախակի օգտագործվող մեթոդներով, ինչպես նաև կլինեն խաղաղ ճանապարհով իշխանությունների հետ փոփոխությունների գնացողները: «Ըստ իս` հիմա ամենահարմար պահն է քաղաքական և կադրային փոփոխությունների»,- նշեց Լարիսա Ալավերդյանը:

Մարդու իրավունքների առաջին պաշտպանը, անդրադառնալով «Սասնա ծռեր» զինված խմբի տղաների դատավճռին, նկատեց, որ օրենքով նշված է՝ պատիժը նշանակելիս պետք է հաշվի առնվի դատապարտվող մարդու կյանքի էջերը:

Ալավերդյանի խոսքերով` երևանյան լարված օրերին (հուլիսի 17-31-ը- հեղ.) լրագրողները իրենց տեղում էին: «Մենք ունեցանք լրագրողների մի խումբ, որը գնաց, կանգնեց, ծեծվեց: Եվ հիմա համոզված եմ, որ ամեն ինչ կանեն արդարության վերականգնման համար»,- ասաց նա:

Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:

ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Պատանդ վերցվածներն ազատ են արձակվել մեկ շաբաթվա ընթացքում, սակայն հուլիսի 27-ին նրանք կրկին պատանդ են վերցրել բուժօգնության հասած բուժաշխատողներին:

Հուլիսի 30-ին գնդի տարածքից դիպուկահարի կրակոցից զոհվել է ոստիկանության զորքերի ծառայող Յուրի Տեփանոսյանը:

Հուլիսի 31-ին զինված խմբի անդամները վայր են դրել զենքն ու հանձնվել: