3 րոպեի ընթերցում
ԵՐԵՎԱՆ,18ՀՈՒԼԻՍԻ, ԱՐՄԵՆՊՐԵՍ: Հեղաշրջման ձախողումից հետո Թուրքիայի նախագահ Թայիփ Էրդողանը կշարունակի իր քաղաքականությունը, իսկ Հայաստանի հետ հարաբերությունները Թուրքիայի համար առաջնահերթ չեն: Միանշանակ պարզ չէ նաև, թե հաջողության հասնելու դեպքում ինչ քաղաքականություն կվարեին զինվորականները Թուրքիայում և Հայաստանի վրա դա ինչ ազդեցություն կունենար: Լրագրողների հետ հանդիպմանը հայտարարեց ՀՅԴ Բյուրոյի Հայ Դատի և քաղաքական հարցերի գրասենյակի ղեկավար Կիրո Մանոյանը` անդրադառնալով Թուրքիայում ռազմական հեղաշրջման փորձին: «Թուրքիայի բանակը հայտնի է եղել իր շատ ավելի կոշտ քաղաքականությամբ արտաքին մի շարք հարցերում, այդ թվում` հայկական հարցի առնչությամբ: Չենք կարող ասել, որ հաջողվելու դեպքում անպայման Հայաստանի համար դրական կլիներ: Ներկայում ձախողումից հետո կարող եմ ասել, որ Էրդողանը կշարունակի իր քաղաքականությունը, այսինքն` Հայաստանի հետ հարաբերությունները Թուրքիայի համար առաջնահերթ չեն, իսկ այս փորձից հետո առավել ևս չեն լինի: Թուրքիան կշարունակի իր այդ նույն քաղաքականությունը: Ադրբեջանի հետ իրենց հարաբերությունները սերտ են ու սերտ էլ կմնան»,-«Արմենպրես»-ի փոխանցմամբ` ասաց Կիրո Մանոյանը:
Ինչ վերաբերում է Ռուսաստան-Թուրքիա-Ադրբեջան հարաբերություններին, քաղաքական գործիչը նկատեց, որ հետագա մերձեցումը կարող է մեզ համար մտահոգիչ դառնալ: «Ռուսաստանի հարաբերությունները Թուրքիայի ու Ադրբեջանի հետ տնտեսական նպատակներից ելնելով է, դա մեզ համար ինչ-որ առումով նպաստավոր չէ: Ռուսաստանի կողմից Ադրբեջանին զենք վաճառելը մտահոգիչ է, իսկ եթե Թուրքիա-Ռուսաստան հարաբերությունները վերստին ունենան այն ձևը, ինչ առկա էին մինչ ինքնաթիռի խոցումը, դա արդեն կարող է էլ ավելի մտահոգիչ լինել, քանի որ տնտեսական կապերը կարող են սերտաճել ռազմականի»,-ավելացրեց ՀՅԴ-ական գործիչը: Նրա խոսքով` Հայաստանը պետք է զգոն և ուշադիր լինի, հետևի բոլոր իրադարձություններին իր շահերը ճիշտ պաշտպանելու համար:
Կիրո Մանոյանի կարծիքով` ներքին հարցերից ուշադրությունը շեղելու քաղաքականություն Թուրքիան կվարի ոչ միայն Ղարաբաղի հարցով, այլև մի շարք այլ արտաքին խնդիրներով, բայց ներքին խնդիրներն այնքան խորն են, որ կստիպեն իշխանություններին առերեսվել այդ հարցին: «Ինտրիգներ պետք է սպասել տարածաշրջանային քաղաքականության մեջ, դրա համար էլ անհրաժեշտ է, որ լինենք զգոն ու միակամ, չեմ ասում բոլոր հարցերում միակարծիք, բայց հիմնական թիրախները նույնը պետք է լինեն բոլորիս համար»,-եզրափակեց ՀՅԴ Բյուրոյի Հայ Դատի և քաղաքական հարցերի գրասենյակի ղեկավարը:
Թուրքիայում հուլիսի 15-ի ձախողված հեղաշրջման ժամանակ Թուրքիայի տարբեր քաղաքներում սկսված բախումների հետևանքով զոհվել է շուրջ 290 մարդ: Վիրավորների թիվը պաշտոնական տվյալներով 1440 է: