Ադրբեջանն ուսումնական թռիչքներով փորձում է հոգեբանական ճնշում գործադրել հայկական կողմի վրա. քաղաքագետ

ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Ադրբեջանն ուսումնական թռիչքներով փորձում է հոգեբանական ճնշում գործադրել հայկական կողմի վրա: Այս մասին «Արմենպրես»-ի հետ զրույցում նշեց քաղաքագետ Նարեկ Գալստյանը: «Նման ուսումնական թռիչքների հիմնական նպատակը հնարավոր ռեալ ռազմական զարգացումներին պատրաստ լինելն է: Նրանց համար հիմնական թշնամին մենք ենք, դա նշանակում է, որ այդ վարժանքներն ուղղված են մեր դեմ: Դրան գումարած կա հոգեբանական գործոնը` ցույց տալ սպառազինությունը և այլն»,-ասաց Նարեկ Գալստյանը:

Առաջիկայում սպասվում է Հայաստանի ու Ադրբեջանի նախագահների հերթական հանդիպումը, դրանից բացի, նախատեսված է ԱՄՆ պետքարտուղար Ջոն Քերիի այցը Ռուսաստան, որքանո՞վ է հավանական լարվածությունը: Հարցին ի պատասխան, քաղաքագետը նշեց, որ այս փուլում ոչինչ չի կարելի է բացառել:

«Եղել են դեպքեր, երբ բարձրաստիճան պաշտոնյաների այցից առաջ, այցի ընթացքում կամ դրանից հետո Ադրբեջանը սահմանին լարվածություն է հրահրում: Կարծում եմ, որ մոտ ժամանակներում սահմանին կառավարելի լարվածություն կլինի, մինչև Ադրբեջանը հասկանա, թե ինչ է ուզում անել: Ավիացիայում այսպիսի հասկացություն կա` վերադաձի անհնարիության կետ: Հիմա Ադրբեջանի ծավալապաշտական հայտարարությունները հասցրել են մի կետի, որից վերադարձ հնարավոր չէ: Նրանք հայտարարում են, որ ամբողջ Ղարաբաղն են ուզում, հետևաբար դա իրենց համար լուրջ խնդիր է ու պետք է ժողովրդին ցույց տան` իբր իրենց գործին նվիրված են»,-ասաց քաղաքագետը:

Ղարաբաղա-ադրբեջանական հակամարտ զորքերի շփման գծի հարավարևելյան ուղղությամբ Ադրբեջանը ուղղաթիռների և ինքնաթիռների կիրառմամբ ուսումնամարզական թռիչքներ է անցկացնում: ԼՂՀ ՊՆ հայտարարության մեջ ասվում է. «Հուլիսի 13-ին՝ ժամը 08:26-ից սկսած, ղարաբաղա-ադրբեջանական հակամարտ զորքերի շփման գծի հարավարևելյան ուղղությամբ հակառակորդը շփման գծից 30 կմ խորության վրա, ուղղաթիռների և ինքնաթիռների կիրառմամբ, անց է կացնում ուսումնամարզական թռիչքներ: Ժամը 11:00-ի դրությամբ այդ ուսումնամարզական թռիչքներին ներգրավված է եղել 12 ինքնաթիռ և 41 ուղղաթիռ: ՊԲ հակաօդային պաշտպանության ուժերը ռադիոլոկացիոն, կրակային և դիտարկման համակարգերի միջոցով վերահսկում են ադրբեջանական զինուժի ուսումնամարտական թռիչքները և աչալուրջ հետևում դրանց գործողություններին»: