Հայաստան Հռոմի պապի այցի ընթացքում թուրքական հակազդեցությունը այդքան բուռն չի եղել. թուրքագետ
2 րոպեի ընթերցում
ԵՐԵՎԱՆ,27 ՀՈՒՆԻՍԻ,ԱՐՄԵՆՊՐԵՍ: Հռոմի պապի՝ Հայաստան այցի ընթացքում Թուրքիայի հակազդեցությունը այդքան բուռն չի եղել:«Արմենպրես»-ի հաղորդմամբ, հունիսի 27–ին տեղի ունեցած ասուլիսի ժամանակ թուրքագետ Հակոբ Չաքրյանը նշեց, որ Պապի կողմից «ցեղասպանություն» եզրույթն արտահայտելու պարագայում անգամ Թուրքիայի պահվածքում առանձնապես բուռն հիստերիա ու ագրեսիա չեղավ:
«Թուրքիան Հայոց ցեղասպանության 100-ամյա տարելիցի միջոցառումների ժամանակ արդեն իսկ բոլոր միջոցներով փորձել էր հակազդել: Նույնը կրկնել, ըստ երևույթին, նպատակահարմար չի գտել: Թուրքերը, երևի թե, հասկանում են, որ բուռն հակազդեցությունների ժամանակներն անցնում են, որովհետև Հայոց ցեղասպանության ճանաչման գործընթացի ծավալումը լիարժեք սպառել է թուրքական ժխտողականության դիրքերը: Թուրքիան հետզհետե նոր հարվածներ է ստանում: Այդ հարվածներից ամենահզորներից մեկը Բունդեսթագի որոշումն էր: Թուրքիան Գերմանիայի դաշնակիցն է եղել և եթե վերջինս ընդունում է իր դաշնակցի կատարած ցեղասպանությունը, ապա Թուրքիայի ժխտողականաությունը որևէ ազդեցություն ունենալ չի կարող»,-ասաց նա
Թուրքագետի կարծիքով, Թուրքիան Հռոմի պապի վրա ազդելու հնարավորություն չունի: Չաքրյանը մի կարևոր հանգամանք ևս նկատեց, որ Պապի կողմից «ցեղասպանություն» եզրույթն արտահայտելուն ի պատասխան Թուրքիան հանդես եկավ փոխվարչապետի մակարդակով:
«Պետությունների համար պարտավորեցնող է նախագահի, վարչապետի և արտգործնախարարության հայտարարությունները: Որպեսզի Թուրքիայի հայտարարությունը պարտավորեցնող չլինի, հանձնարարել են հենց փոխվարչապետին:Այս ամենը ներքին օգտագործման համար է»,-նշեց թուրքագետը: