2 րոպեի ընթերցում
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Սիրիայի նախագահ Բաշար Ասադը հայտարարել է, որ Թուրքիայի նախագահ Ռեջեփ Թայիփ Էրդողանը համաշխարհային քաղաքականության ոլորտում խուլիգանի դեր է խաղում, իսկ նրա ռեժիմը` «ֆաշիստական» է:
Ինչպես հաղորդում է «Արմենպրես»-ը, այս մասին հայտնում է ֆրանսիական I24TV հեռուստաալիքը:
«Էրդողանի ֆաշիստական ռեժիմը մշտապես կենտրոնացել էր Հալեպի վրա, բայց նրա երազանքները կթաղվեն Հալեպում», -երկրի նոր խորհրդարանին հղած խոսքում ասել է Բաշար Ասադը:
«Վերջին շրջանում Էրդողանը հազարավոր ահաբեկիչներ է թույլ տվել գալ Հալեպ: Նա համաշխարհային քաղաքականության ոլորտում խուլիգանի դեր է խաղում», -ասել է Սիրիայի ղեկավարը:
Ասադը շնորհակալություն է հայտնել Ռուսաստանին, Իրանին եւ Չինաստանին «հավատարիմ եւ անփոփոխ աջակցության» համար:
«Ահաբեկչության ջախջախումն անխուսափելի է, քանի դեռ կան այնպիսի երկրներ, ինչպիսին Իրանն է, Ռուսաստանը եւ Չինաստանը, որոնք հարգում են սկզբունքները եւ պաշտպանում ժողովուրդների ինքնորոշվելու իրավունքը: Շնորհակալություն նրանց դրա համար», -հայտարարել է Սիրիայի նախագահը, ում խոսքը մեջբերել է Sputnik-ը:
Սիրիայի խորհրդարանի առաջին նսիտը տեղի է ունեցել մայիսի 7-ին` ապրիլի 13-ին Դամասկոսի կողմից վերահսկվող շրջաններում անցկացված ընտրություններից հետո:
«Սիրիայի ժողովուրդը դարձյալ զարմացրել է աշխարհին ընտրություններին իր բացառիկ ներկայությամբ ու թեկնածուների մեծ թվով», -նշել է Բաշար Ասադը: