Լևոն Արոնյանն առցանց տիրույթում կմրցի Ալեքսանդր Գրիշչուկի հետ

ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ: «Chess.com» կայքը կազմակերպել է Լևոն Արոնյան-Ալեքսանդր Գրիշչուկ շախմատային բլից պարտիա:

«Արմենպրես»-ը հայտնում է, որ ապրիլի 6-ին Երևանի ժամանակով 21:00-ին հայ գրոսմայստերի դեմ առցանց կմրցի 32-ամյա Գրիշչուկը:

«Անհամբերությամբ սպասում եմ Արոնյան-Գրիշչուկ բլից-պայքարին: Արոնյանը կփորձի ուշքի գալ հավակնորդների մրցաշարից հետո»,- Twitter-յան իր միկրոբլոգային էջում գրել է շախմատային թագի ներկայիս տիրակալ Մագնուս Կառլսենը` հանրության ուշադրությունը սևեռելով այս ինքնատիպ մրցամարտի վրա:

Ըստ «Chess.com» կայքի անձնակազմի ներկայացուցիչ Դանիել Ռենսչի` դեռ ապրիլի 5-ին նախնական խաղային փորձարկում է եղել Լևոն Արոնյանի և կայքի մեկնաբան Ռոբերտ Հես 2-րդի միջև:

«Արոնյանն անգամ կատակել է մեր ամերիկյան խոսվածքի վերաբերյալ»,- հայտարարել է «Chess.com» կայքի անձնակազմի ներկայացուցիչը: