Թալիշներին ձեռնտու է, որ Ադրբեջանական Հանրապետություն տարածաշրջանի քարտեզին չլինի. Ֆահրադին Աբոսզոդա
2 րոպեի ընթերցում
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Թալիշներին ձեռնտու է, որ Ադրբեջանական Հանրապետություն տարածաշրջանի քարտեզին չլինի: Այս մասին «Ադրբեջանական հանրապետության բնիկ ժողովուրդները իրականություն և հեռանկարներ» խորագրով քննարկման ընթացքում նշեց թալիշ գիտնական, քաղաքագետ և հասարակական գործիչ, թալիշական շարժման առաջնորդներից Ֆահրադին Աբոսզոդան, ով կլոր սեղանին միացավ տեսակապի միջոցով:
«Թալիշների համար ամենահաջողված տարբերակը կլինի անկախության ձեռքբերումը: Սա պարզ, հստակ նպատակ է: Իհարկե, շատ թալիշներ կան, որոնք չեն ընդունում այս նպատակը, ես կարեկցանքով եմ մոտենում դրան: Մեր մտավորականության մեծ մասն ընդունում են սա: Մեր գաղափարները համընկնում են մեր ընկեր հայերի տեսակետերի հետ: Մեզ ձեռնտու է, որ Ադրբեջանական Հանրապետություն տարածաշրջանի քարտեզին ընդհանրապես չլինի: Ես վստահ եմ, որ ապագայում այդպես էլ կլինի»,-«Արմենպրես»-ի փոխանցմամբ` նշեց Ֆահրադին Աբոսզոդան:
Նրա խոսքով` Ադրբեջանում շատ են բնիկ ժողովուրդներ, բայց ոչ բոլորն են պատրաստ պայքարելու սեփական գոյության համար: Ֆահրադին Աբոսզոդան շեշտեց, որ թալիշների հարցը քննարկվում է տարբեր փորձագետների շրջանում:
Կովկաս-կասպիական տարածաշրջանի բնիկ ժողովուրդների ինստիտուտը և «Մոդուս վիվենդի» կենտրոնը կազմակերպել են կլոր սեղան քննարկում, որի թեման է «Ադրբեջանական հանրապետության բնիկ ժողովուրդները իրականություն և հեռանկարներ»: Քննարկմանը մասնակցում են նաև փոքրամասնությունների ներկայացուցիչներ Ադբրեջանից:
