Հինգ միսիոներ կանանց մասին պատմող «Փրկության քարտեզ» ֆիլմը կցուցադրվի մի շարք երկրներում

ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Հայ ժողովրդին աջակցած հինգ միսիոներ կանանց ճակատագրերն ու պատմություններն ամփոփող «Փրկության քարտեզ» ֆիլմը շարունակում է իր հաղթարշավը: Կինոնկարի մտահղացման հեղինակ, գխավոր պրոդյուսեր և «Ման Փիքչրս» ստուդիոյի հիմնադիր-տնօրեն Մանվել Սարիբեկյանն «Արմենպրես»-ին տեղեկացրեց, որ ֆիլմը կցուցադրվի Լիբանանում, Էստոնիայում, հնարավոր է նաև Բուլղարիայում, ԱՄՆ-ում:

«Մոտակա 5-6 ամիսներին ուրվագծված է, թե որ երկրներում է ցուցադրվելու ֆիլմը: Որոշ երկրների հետ էլ բանակցություններ են տարվում: Ֆիլմը ներկայացված է նաև փառատոնների, որոնց մասին առավել մանրամասն կհայտնեմ այն ժամանակ, երբ կլինեն դրական պատասխաններ»,-նշեց նա:

Կինոնկարը վերջերս է ցուցադրվել Դանիայում և Շվեդիայում և մեծ հետաքրքրություն առաջացրել այդ երկրներում:

«Դանիայում` Կոպենհագեն և Օրհուս քաղաքներում, դեկտեմբերի 12-13-ը ֆիլմի ցուցադրությունը կազմակերպել էր Դանիայում և Նորվեգիայում Հայաստանի դեսպանությունը` դեսպան Հրաչյա Աղաջանյանի նախաձեռնությամբ: Ես և ֆիլմը վարող պատմաբան Սվանտե Լունդգրենը մասնակցեցինք միջոցառումներին: Հրավիրված էին նաև պատմաբաններ, մեր խորհրդատուները: Շվեդիայում ֆիլմը ցուցադրվեց Ստոկհոլմում դեկտեմբերի 14-ին»,-նշեց նա:

Ֆիլմը ցուցադրվել է անգլերեն լեզվով: «Մենք որոշել ենք, որ ֆիլմում ենթագրեր չենք օգտագործելու, որովհետև այն խանգարում է հանդիսատեսին: Ցավոք, միայն թղթի վրա ունենք թարգմանված ֆիլմի ֆրանսերեն և ռուսերեն տարբերակները, դեռևս չկան ֆինանսական միջոցներ, որպեսզի կարողանանք այլ լեզուներով թարգմանել և ձայնագրել»,-հավելեց Մանվել Սարիբեկյանը:

Նրա խոսքով` ֆիլմը բավականին լավ է ընդունվել: «Անհանգտություն, մտավախություն կար, որովհետև վերջին հաշվով վավերագրական ֆիլմ է, պատմաբաններ են ներկա, ֆիլմի հերոսուհիների կենսագիրը: Ոչ մի առարկություն չեղավ իրենց կողմից»,-շեշտեց Մանվել Սարիբեկյանը:

Հայ ժողովրդին աջակցած հինգ միսիոներ կանանց ճակատագրերն ու պատմություններն ամփոփող «Փրկության քարտեզ» ֆիլմը հանրությանը ներկայացվեց 2015-ին: Ռեժիսոր Արամ Շահբազյանի խաղարկային փաստավավերագրական ֆիլմը համամարդկային ցավի, մի ազգին պատահած փորձությունների մասին է՝ աշխարհի տարբեր կողմերից օգնության շտապող այլազգի հինգ կին հումանիստների օրինակով: Կինոնկարը նկարահանվել է ինը երկրի 29 քաղաքներում: Ֆիլմը վարում է ֆինն պատմաբան, ցեղասպանությունների մասին պատմող գրքերի հեղինակ Սվանտե Լունդգրենը: Անցնելով ֆիլմի հերոսների առաքելության ճանապարհը՝ նա գծում է մի նոր քարտեզ` «Փրկության քարտեզը»:

Ֆիլմի հերոսները եվրոպացի հինգ հումանիստ կանայք են` Քարեն Եփփեն (Դանիա), Մարիա Յակոբսենը (Դանիա),Բոդիլ Բյորնը (Նորվեգիա), Ալմա Յուհանսոնը (Շվեդիա), Հեդվիգ Բյուլը (Էստոնիա): Ֆիլմում Ցեղասպանությունն է, սակայն այն մարդասիրական լույսի տակ է ներկայացվում: