1 րոպեի ընթերցում
ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի շախմատի հավաքականի առաջատար Լևոն Արոնյանը մեծ սպասելիքներ ունի Եվրոպայի շախմատի թիմային առաջնությունից:
«Հայաստանը լավ հավաքական ունի: Մեր ընտրանին պայքարում է առաջին հորիզոնակաների համար: Հուսամ, այս անգամ մենք կկարողանանք Եվրոպայի առաջնությունում լավ հանդես գալ»,-«Արմենպրես»-ի հաղորդմամբ, Արոնյանի խոսքը մեջ է բերում Chess-news կայքը:
Արոնյանը խոսել է նաև աշխարհի ուժեղագույն շախմատիստների մասին, մասնավորապես, փաստելով. «Երդվում եմ, որ թագի համար պայքարում ինձ դեռ կտեսնեք...Կարծում եմ, որ ես ուժեղագույնն եմ»,-ասել է Արոնյանը:
Իսլանդիայի մայրաքաղաք Ռեյկյավիկում նոյեմբերի 12-22-ը կանցկացվի շախմատի Եվրոպայի թիմային առաջնությունը: Հայաստանի հավաքականի կազմում հանդես կգան Լևոն Արոնյանը, Գաբրիել Սարգսյանը, Սերգեյ Մովսիսյանը, Հրանտ Մելքումյանը և Հայաստանի գործող չեմպիոն Կարեն Գրիգորյանը: Վերջինս առաջին անգամ հանդես կգա հավաքականի կազմում: