Սահմանադրության նախագիծն ավելի հստակ է սահմանում իշխանությունների տարանջատման սկզբունքը. սահմանադրագետ

ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Սահմանադրական փոփոխությունների նախագիծը շատ ավելի հստակ է սահմանում դրույթները` իշխանությունների տարանջատման սկզբունքի եւ մարդու իրավունքների երաշխավորման առնչությամբ: Այս մասին նշեց սահմանադրագետ Գաբրիել Բալայանը հոկտեմբերի 29-ին լրագրողների հետ հանդիպմանը: «Արմենպրես»-ի փոխանցմամբ` Բալայանը վստահություն հայտնեց, որ հնարավոր փոփոխություններից հետո էլ կարեւորագույն խնդիրը լինելու է դրա կիրառությունը: «Զուտ տեքստը որևէ բան չի տալու: Շատ երկրներ սահմանադրություն չունեն: Շատ զարգացած երկրներում էլ իշխանության տարաբաժանման սկզբունքը հստակեցված չէ: Կարծում եմ, պետք չէ սահմանադրական փոփոխություններն ընկալել որպես խնդիրները լուծելու միջոց»,- ասաց Բալայանը` հավելելով, որ ներկա փոփոխություններից հետո չի կարելի լինել միամիտ եւ հավատալ, որ խնդիրները վերանալու են: «Օրինակ, եթե ունենանք այնպիսի ընտրություններ, որ ունեցել ենք վերջին 10-15 տարվա ընթացքում, ավելի վատ է լինելու»,- ասաց Բալայանը:

Դեկտեմբերի 6-ին Հայաստանում կանցկացվի սահամանդրական փոփոխությունների հանրաքվե: Սահմանադրական փոփոխություններով առաջարկվում է կառավարման խորհրդարանական մոդելը: