ԵԱՀԿ դիտորդներն անկողմնակալ դեր ունեն, նրանց անվտանգությունը երբեք չպետք է վտանգվի. ԱՄՆ դեսպանատուն
2 րոպեի ընթերցում
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետությունում Ամերիկայի Միացյալ Նահանգների դեսպանատունը«Արմենպրես»-ի խնդրանքով մեկնաբանեց հոկտեմբերի 27-ին Լեռնային Ղարաբաղի և Ադրբեջանի զինված ուժերի շփման գծի ԵԱՀԿ դիտորդական առաքելության դիտարկման ավարտի պահին ադրբեջանական կողմից ավտոմատ հրազենից գրանցված գնդակոծության փաստը:«Լեռնային Ղարաբաղի շփման գծի երկայնքով ԵԱՀԿ դիտորդական առաքելության ժամանակ երեկ հնչած կրակոցներն անընդունելի են: ԵԱՀԿ դիտորդներն արժեքավոր և անկողմնակալ դեր ունենանկայուն տարածաշրջանում կայունության ապահովման գործում, և նրանց անվտանգությունը երբեք չպետք է վտանգվի: Մինսկի խմբի համանախագահները մասնակցել են երեկվա առաքելությանը: Մենք ցանկանում ենք, որպեսզի կողմերը համանախագահների հետ համատեղ աշխատանքի միջոցով հասնեն այս հակամարտության տևական կարգավորման` նրանց անվտանգությունը վտանգելու փոխարեն »,-նշված է ԱՄՆ դեսպանատան պատասխանում:
ԼՂՀ արտգործնախարարության տեղեկատվական վարչությունից տեղեկացրել էին, որ հոկտեմբերի 27-ին Լեռնային Ղարաբաղի և Ադրբեջանի զինված ուժերի շփման գծի դիտարկման ժամանակ ԵԱՀԿ Մինսկի խմբի համանախագահները և ԵԱՀԿ գործող նախագահի անձնական ներկայացուցիչն անցել են ադրբեջանական տարածք՝ ԼՂՀ կողմից:
Սակայն, դիտարկման ավարտի պահին գրանցվել է գնդակոծություն ավտոմատ հրազենից ադրբեջանական կողմից: Դիտարկումն անց է կացվել Մարտակերտ-Թարթառ ճանապարհահատվածում՝ ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկի գլխավորությամբ և ԵԱՀԿ Մինսկիխմբի համանախագահների մասնակցությամբ: