3 րոպեի ընթերցում
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբերի 10-ին Անկարայում ահաբեկչության գործողության 15-ամյա վկա մի աղջիկ (անունը չի բացահայտվում) ոստիկանությանը հայտնել է, որ որպես մահապարտներ կասկածվող անձինք պայթյուններից առաջ գնացել են տարածքում գտնվող մզկիթի զուգարան:
Ինչպես հաղորդում է «Արմենպրես»-ը` վկայակոչելով թուրքական «Միլիեթ» թերթ, աղջիկը պատմել է, որ այդ անձինք պայթեցրել են իրենց վրա եղած պայթուցիկները, եւ միջադեպի արդյունքում մաս-մաս լինելով մահացել է նաեւ իր ընկերը: Ոստիկանությունն ուսումնասիրում է աղջկա պնդումները:
Միջադեպի վկան պատմել է, որ պայթյունից առաջ տեսել է մզկիթի զուգարանից դուրս եկող մահմեդական ծածկոցով երկու կնոջ: Հետո ներս է նայել եւ տեսել, որ այնտեղ եւս 4 մարդ կա:
Աղջկա խոսքով` այդ ահաբեկիչների մեջ ադրբեջանցիներ էլ են եղել: Նա ասել է, որ այդ 4 հոգին իրար հետ խոսել են ադրբեջաներեն եւ քրդերեն:
«Նրանք իրար ինչ-որ բան էին ասում: Հետո ռումբերից իֆչ-որ բան էին ուզում սարքել: Իրար միացրած ռումբերը նրանք կապկպեցին սեւ թելով: Նրանցից մեկը դրանք կապեց իր վրա», - իր տեսածը պատմել է աղջիկը:
Վկա աղջիկը հավելել է, որ նրանք նաեւ պայուսակներ ունեին մեջքներին:
«Ես եւ իմ ընկերը դա տեսնելուց հետո դուրս եկանք, եւ մեր տեսածի մասին պատմեցինք ոստիկաններին: Բայց նրանք մեզ չլսեցին…Ահաբեկիչները մեջքների պայուսակները թողեցին եւ գնացին: Ահաբեկիչներից չորսը ներսում էին, չորսը` դրսում: Հետո բոլորը միանգամից գնացին մի ուղղությամբ եւ ռումբերից մեկը պայթեցրեցին այնտեղ: Հետո գետնի վրայից արյունոտ մսակտորներ վերցրեցին եւ քսեցին դեմքներին ու ձեռքերին: Դրանից անմիջապես հետո ռումբ պայթեցրին Ժողովուրդների դեմոկրատական կուսակցության (HDP) անդամների հավաքատեղիում: Ահաբեկիչները ռումբ նետեցին նաեւ իմ ընկերոջ վրա: Նա մաս-մաս եղավ, գլուխը ոտքիս տակ ընկավ»,-պատմել է աղջիկը:
Անկարայի ահաբեկչությունից հետո Թուրքիան հրապարակել է երկար ժամանակ որոնման մեջ գտնվող «Իսլամական պետություն» ահաբեկչական խմբավորման 21 մահապարտների ցուցակը: Ցուցակում, որի մեջ 6 կանանց անուններ են, «կենդանի ռումբ» բնութագրվող ադրբեջանցի կնոջ անուն էլ կա: Դա Թուրքիայում որոնման մեջ գտնվող Ուլքեր Մամեդովան է, հայտնում է «Միլիեթ» թերթը: