Արցախյան ազատամարտում որդի կորցրած և վիրավոր ազատամարտիկների 30 երևանաբնակ ընտանիքներ կտոնեն բնակարանամուտը
2 րոպեի ընթերցում
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Արցախյան ազատամարտում որդի կորցրած և վիրավոր ազատամարտիկների 30 երևանաբնակ ընտանիքներ կտոնեն բնակարանամուտը: «Արմենպրես»-ի հաղորդմամբ` հոկտեմբերի 9-ին «Էրեբունի-Երևան 2797» տոնի առիթով նրանց բնակարանի սեփականության վկայականները հանձնեց քաղաքապետ Տարոն Մարգարյանը:
Մայրաքաղաքի ծննդյան առթիվ բնակարան ստացողներից է նաև 8 զավակների հայր և ազատամարտիկ Արթուր Փափազյանը, ով երկար տարիներ ընտանիքի հետ բնակվել է մեկ սենյակում:
«Շատ էի սպասում այս բնակարանին: Մեծ որդիս 26 տարեկան է, և այդ տարիների ընթացքում սպասում էի բնակարանին` մինչև այս օրը: Կնոջս և 8 երեխաներիս հետ մինչ այժմ ապրում էինք քսանութ քառակուսի մետրի բնակմակերեսի վրա՝ առանց կոմունալ հարմարությունների: Իսկ հիմա ապրելու ենք նորակառույց շենքի երեքսենյականոց բնակարանում»,- նկատեց Արթուր Փափազյանը:
«Արժանավորները շատ են, և շատ են սոցիալապես անապահով ընտանիքները, որոնք կարիք ունեն բնակարանի: Բայց մեր հնարավորությունները դեռ սուղ են: Այնուամենայնիվ քաղաքապետարանը աշխատանքներ է տանում մեր կարիքավոր ընտանիքների և արժանավոր մարդկանց համար նոր շենքերի կառուցման հարցում»,- ասաց Տարոն Մարգարյանը:
Քաղաքապետը նշեց, որ բնակարան ստացած ազատամարտիկների և զոհված ազատամարտիկների ընտանիքների ցուցակները մշակվել են Պաշտպանության նախարարության հետ համատեղ, և հետագայում քաղաքապետարանը պատրաստվում է նմանատիպ ծրագրեր իրականացնել բնակարանի կարիք ունեցող և զոհված ազատամարտիկների ընտանիքների համար: