2 րոպեի ընթերցում
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Սևանա լճի հարավարևմտյան մասում՝ գողտրիկ լեռներով շրջապատված Լիճք գյուղում, տարվա 8-9 ամիսներին իշխում են կանայք: Նրանք ամրակազմ, հաստատակամ կանայք են, ովքեր խիզախորեն հոգ են տանում ոչ միայն իրենց ընտանիքների, այլև ամբողջ գյուղի մասին: Ինչպես փոխանցում է «Արմենպրես»-ը, նման կերպ է սկսել Լիճք գյուղին նվիրված խմբագրականը CNN-ը:
Հայկական Լիճքում շատ աշխատասեր կանայք կան, սակայն այստեղ չես գտնի շատ տղամարդկանց: Այս կանանց ամուսինները գտնվում են նրանցիցհազարավոր մղոններ հեռու` հիմնականում Ռուսաստանի Դաշնությունում: Հայաստանի տնտեսության խնդիրների պատճառով,աշխատանքային տարիքի տղամարդկանց մի ստվար հատվածը մեկնել է արտերկիր` շինարարությունում աշխատելու համար: Աշխատանքի հիմնական բեռն այս պայմաններում մնում է կանանց ուսերին: «Ամեն ինչ արվում է կոլեկտիվ ջանքերով` հողի աշխատանքից մինչև անասուններ պահելը և լավաշ թխելը»,- գրում է CNN-ը:
Ձմռան ամիսներին, երբ երկար բացակայությունից հետո վերադառնում են տղամարդիկ, գյուղի բնակիչների համար իրական տոն է սկսվում. կյանքը լցվում է հարսանիքներով, ծնունդներով և խնջույքներով:
Ֆոտոլրագրող Ջուլիեն Փեբրելը, իմանալով Լիճքի մասին, երկու շաբաթ բնակվել է այնտեղ` լուսանկարելով ու փաստագրելով գյուղացիների կյանքը: