368.05
Միացյալ Նահանգներն առաջին արձագանքն է տվել Թուրքիայում ԱՄՆ հյուպատոսարանի վրա հարձակմանը
1 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Ստամբուլում ԱՄՆ հյուպատոսարանի վրա երկու ահաբեկիչ կանանց կողմից իրականացված հարձակման պատճառները և մանրամասները դեռևս պարզվում են Միացյալ Նահանգների կողմից: Ինչպես հաղորդում է «Արմենպրես»-ը՝ վկայակոչելով թուրքական «Միլլիեթ» պարբերականը, այս մասին հայտնել է Թուրքիայում ԱՄՆ դեսպանության խոսնակը:
«Դեռևս փորձում ենք հասկանալ, թե ինչ է պատահել»,- ասել է խոսնակը՝ Միացյալ Նահանգների կողմից առաջին պաշտոնական մեկնաբանությունը տալով Թուրքիայում ԱՄՆ դեսպանության վրա իրականացված հարձակումից հետո:
Երկու կանայք օգոստոսի 10-ի վաղ առավոտյան կրակ էին բացել Ստամբուլում ԱՄՆ հյուպատոսարանի վրա: Հարձակման հետևանքով զոհեր կամ վիրավորներ չեն եղել: Հյուպատոսարանի անվտանգության աշխատակիցների արձակած պատասխան կրակոցից հետո ահաբեկիչները փախել էին: Թուրքական ոստիկանությանը հաջողվել էր չեզոքացնել հարձակումից հետո հարակից տներից մեկում պատսպարված ահաբեկիչ կնոջը, որը վիրավոր է եղել:
ԱՄՆ հյուպատոսարանի հարակից շրջանների փողոցները շարունակում են փակ մնալ: Ոստիկանները տուն առ տուն շարունակում են որոնողական աշխատանքները` մյուս հարձակվողին գտնելու նպատակով:
Բաժանորդագրվեք մեր ալիքին Telegram-ում