«Նոր գիրք»-2/26. «Երգ` առանց մեղեդու»
2 րոպեի ընթերցում
![«Նոր գիրք»-2/26. «Երգ` առանց մեղեդու»](http://armenpress.am/resized/480/static/news/b/2015/08/814044.jpg)
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ և ծանոթանալ դասական երկերին ու արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել: Այս շաբաթ «Արմենպրես»-ը դարձյալ առանձնացրել է նոր հրատարակված երկու ուշագրավ գիրք՝ երկու խորագրի ներքո:
Ժամանակակից գրականություն
Նոր-Այր, «Երգ` առանց մեղեդու»
Իրավաբան-բանաստեղծ Նոր-Այրը (Նորայր Հակոբյան) իր առաջին փորձն է կատարել գրական աշխարհում և ներկայացրել իր ստեղծագործություններն ամփոփող գիրք: «Երգ` առանց մեղեդու» բանաստեղծությունների ժողովածուն տպագրվել է «Զանգակ» հրատարակչությունում:
«Ես գրող չեմ, մասնագիտությամբ իրավաբան եմ: Գրքում զետեղված է այն ամենը, ինչ ապրել եմ և կարողացել եմ թղթին հանձնել: Չկա սարքած տող, չկա սարքած բառ: Իմ կյանքում լավ բաները միշտ պատահական են լինում. գրելն էլ պատահական ստացվեց: Սկսել եմ ստեղծագործել 2013 թվականից` 27-28 տարեկանում: Ընկերներիս հորդորով, այդ ամենը գիրք դարձավ»,- իր գրքի մասին ասել է Նորայր Հակոբյանը:
Մանկական գրականություն
«Հեքիաթներ արքայադուստրերի մասին»
Երեք ամենահեքիաթային պատմություններն արքայադուստրերի մասին՝ մեկ գրքում: «Արքայադուստր Լինդան», «Կեոնեխ թագավորը» և «Ոսկեծամիկը հեքիաթները» դաստիարակչական են, անչափ հուզիչ և գեղեցիկ: Գիրքը հրատարակել է «Բուկինիստ»-ը:
«Նոր գիրք»-ը ներկայացրեց Ռոզա Գրիգորյանը