Այսօր համբույրի միջազգային օրն է
1 րոպեի ընթերցում
![Այսօր համբույրի միջազգային օրն է](http://armenpress.am/resized/480/static/news/b/2015/07/811404.jpg)
ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: Նախկինում միայն Մեծ Բրիտանիայի տոնացույցում որպես համբույրի միջազգային օր ընդգրկված հուլիսի 6-ն այսօր ողջ աշխարհում հայտնի է որպես Համբույրի միջազգային օր: «Արմենպրես»-ի փոխանցմամբ՝ հենց Մեծ Բրիտանիայում XIX դարի վերջին որոշվեց, որ համբույրն այնպիսի կարեւոր, անփոխարինելի եւ հուզիչ երեւույթ է, որ չի կարելի հատուկ օր չնվիրել դրան: Տոնը նշելու միակ պայմանն այն է, որ պետք է համբուրվել, որքան շատ` այնքան լավ:
Միջազգային օրը, որն այսօր նշվում է ողջ աշխարհում, իր հետ բերել է նաեւ բազմաթիվ ռեկորդներ: Օրինակ, առաջին ամենաերկար համբույրը 2005 թվականին էր, երբ Մեծ Բրիտանիայում բնակվող մի զույգ համբուրվեց 31 ժամ 30 րոպե: Այնուհետեւ, 2009 թ. Սուրբ Վալենտինի օրը գերմանացիներ Նիկոլա Մատովիցն ու Քրիստինա Ռեյնհարթը նոր ռեկորդ գրանցեցին՝ համբուրվելով 32 ժամ: Մինչ այժմ համբույրի չգերազանցված ռեկորդակիրները Էկկաչայ եւ Լակսանա Տիրանարատներն են, ովքեր 2013թ. համբուրվել են 58 ժամ 35 րոպե եւ 58 վայրկյան: