2 րոպեի ընթերցում
ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Ոստիկանության քրեական հետախուզության գլխավոր վարչության 3-րդ վարչության պետ Նելլի Դուրյանը Բաղրամյան փողոցի նստացույցի տարածքում էր՝ ճշտելու՝ արդյոք ակցիային մասնակցող անչափահասները ծնողների հե՞տ են, թե՝ ոչ:
«Ուզում ենք տեսնել՝ ցույցի տարածքում երեխաներ կա՞ն, թե՝ չէ, և արդյոք ծնողների հե՞տ են: Աշխարհի ոչ մի երկրում հավաքների վայրերում այսքան երեխա չեք տեսնի: Նման հավաքների ժամանակ երեխաների համար վտանգավոր է տարածքում գտնվելը»,- «Արմենպրես»-ի փոխանցմամբ՝ նշեց գնդապետ Դուրյանը:
Բացի այդ, նա ընդգծեց, որ առաջին անգամ չէ այցելում նստացույցի վայր, պարզապես նախկին այցերի ժամանակ կրել է քաղաքացիական հագուստ: «Ոստիկանության տվյալ ստորաբաժանումը զբաղվում է երեխաների շահերի պաշտպանությամբ, և մեր աշխատանքն է՝ զրուցել այստեղ գտնվող երեխաների հետ»,- հավելեց Դուրյանը:
Գնդապետն ընդգծեց, որ եղանակային պայմաններն ու բարձր ջերմաստիճանը վտանգ են երկայացնում փոքր տարիքի երեխաների համար, և հարկավոր չէ ցերեկային ժամերին նրանց թույլատրել երկար մնալ փողոցում: «Իսկ ուշ ժամերին անչափահասներն ընդհանրապես չպետք է լինեն դրսում»,- ասաց նա: Ցուցարարներից մեկը նկատեց, որ նստացույցի օրերին Բաղրակյանում եղել են թափառաշրջիկ երեխաներ, և նրանց վրա հրավիրեց Նելլի Դուրյանի ուշադրությունը: Դուրյանն էլ արձագանքեց, որ թափառաշրջիկ երեխաների խնդիրը միշտ եղել է ոստիկանության ուշադրության կենտրոնում:
Իսկ երբ հետաքրքրվեցին, թե Ոստիկանությունն արդյոք Բաղրամյանից ահազանգեր ստացել է այդ խնդրի առնչությամբ՝ գնդապետ Դուրյանը պատասխանեց, որ ինքն անձամբ չի ստացել ահազանգ, սակայն ոստիկանության տարբեր ստորաբաժանումներում եղել են զանգեր: