2 րոպեի ընթերցում
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ և ծանոթանալ դասական երկերին ու արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել: Այս շաբաթ «Արմենպրես»-ը դարձյալ առանձնացրել է նոր հրատարակած երկու ուշագրավ գիրք՝ երկու խորագրի ներքո:
Հայ գրականություն
Մարիանա Պէրթիզլեան Ղազարեան, «Բողբոջող անմոռուկներ»
Գիրքը հրատարակվել է Արևմտյան Ամերիկայի համազգային «Ռիթա Սապունճեան Տեմիրճեան» արևմտահայերենի գրական հիմնադրամի հովանավորությամբ: Գրքում ընդգրկված են սիրիահայ գրող Մարիանա Պէչթօզլեան Ղազարեանի արձակ գրությունները, որոնց թեման Հայոց ցեղասպանությունն է, ինչպես նաև Սիրիայի դեպքերը, որոնք դիտարկվում են որպես շարունակվող ցեղասպանություն: Գիրքը հրատարակել է «Անտարես»-ը:
Մանկապատանեկան գրականություն
Աստրիդ Լինդգրեն, «Էմիլը Լյոնեբերգայից»
Սմոլանդ գավառի Վիմերբի փոքրիկ գավառական քաղաքում, որտեղ Էմիլը հայտնի էր դարձել իր «հերոսություններով», 1907-ի նոյեմբերի 14-ին ծնվել է Աստրիդ Աննա Էմիլիա Էրիկսոնը, ով նույն ինքը՝ շվեդ հռչակավոր մանկագիր Աստրիդ Լինդգրենն է։ Փոքրիկ տղայի մասին երեք վիպակներում էլ մանկագիրը մեծ սիրով ու գորովանքով է նկարագրում իրեն անչափ հարազատ շվեդական բնությունն ու մարդկանց, ավանդական տոներն ու զվարճությունները, կենցաղը, համեղագույն կերակուրները, առասպելներն ու սովորույթները: Գիրքը հրատարակել է «Զանգակ»-ը:
«Նոր գիրք»-ը ներկայացրեց Ռոզա Գրիգորյանը