1 րոպեի ընթերցում
ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ: ՀՀ նախագահ Սերժ Սարգսյանը պատրաստ է ընդունել բողոքի ակցիայի մասնակիցներին: «ՀՀ նախագահը պատրաստ է ընդունել «Ոչ թալանին» նախաձեռնության բողոքի երթի մասնակիցներից երեք-չորս հոգու` պայմանով, որ երթի մասնակիցները կվերադառնան Ազատության հրապարակ»,-«Արմենպրես»-ի թղթակցի հաղորդմամբ` նշեց Երևանի փոխոստիկանապետ Վալերի Օսիպյանը` փոխանցելով ՀՀ ոստիկանապետ Վլադիմիր Գասպարյանի խոսքերը:
Բողոքի ակցիայի մասնակիցները, սակայն չեն համաձայնվում ներկայացրած առաջարկին և երթով շարժվում են Բաղրամյան պողոտայով:Նույն առաջարկը Բաղրամյան պողոտայում հավաքված ցուցարարներին ներկայացրեց Երևանի ոստիկանապետ, գեներալ-մայոր Աշոտ Կարապետյանը:
Երևանի Ազատության հրապարակից մեկնարկել է էլեկտրաէներգիայի սակագնի բարձրացման որոշումը չեղյալ հայտարարելու պահանջով «Ոչ թալանին» նախաձեռնության բողոքի երթը դեպի ՀՀ նախագահական նստավայր: