2 րոպեի ընթերցում
ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ և ծանոթանալ դասական երկերին ու արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել:
Այս շաբաթ «Արմենպրես»-ը դարձյալ առանձնացրել է նոր հրատարակած երկու ուշագրավ գիրք: Սակայն այս անգամ երկու գրքերն էլ ժամանակակից հայ հեղինակների գործեր են:
Ժամանակակից հայ գրականություն
Դավիթ Խաչիյան, «Յոթ քար»
Ժողովածուն անկախության տարիների Հայաստանի սոցիալ-քաղաքական, հոգևոր-բարոյական վայրիվերումների գեղարվեստական ինքնատիպ տարեգրությունն է: Պատմվածքներում, ինչպես հեղինակն է նշում, «բացվում ու փակվում է լուսանկարչական խցիկը, ու մի պատկեր է մնում մեր մտքում՝ ինչ-որ հին, սևուսպիտակ լուսանկարի պես: Ու երբեք չի մոռացվում, քանի որ պարզապես մեր հիշողության մեջ չէ, այլ ինչ-որ ուրիշ մի տեղ....»: Խմբագիրներ՝ Անի Եսայան, Արքմենիկ Նիկողոսյան:
Հովիկ Չարխչյան, «Մինչև աշխարհի ծայրը»
Հովիկ Չարխչյանը ներկայացրել է իր նոր՝ «Մինչև աշխարհի ծայրը» վիպակը:
Երկու գրքերը հրատարակել է «Անտարես»-ը:
«Նոր գիրք»-ը ներկայացրեց Ռոզա Գրիգորյանը