«Նոր գիրք»-2/15. Կենդանարար հոգու և Արարատի գեղեցկության մասին գործեր

ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ և ծանոթանալ դասական երկերին ու արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել:

Այս շաբաթ «Արմենպրես»-ը դարձյալ առանձնացրել է տարբեր հրատարակչությունների նոր հրատարակած երկու ուշագրավ գիրք:

Ժամանակակից գրականություն

Նելլի Շահնազարյան, «Հոգին է կենդանարար... (Մի բուռ լույս)»

Նելլի Շահնազարյանի՝ ընթերցողի դատին ներկայացվող վիպակը ավետարանական «Հոգին է կենդանարար. մարմինը ոչ մի բան չի կարող անել» (Հովհաննես, Զ, 64) մտքից է ստացել իր անվանումը: «Լույս դառնա հոգին», - ասում ենք: Ուրեմն, «Մի բուռ լույսը» նույն «Հոգին է կենդանարար…»: Մարդկային դժվար ճակատագրի բացահայտում է վիպակը՝ իր կառուցվածքային յուրահատկություններով: Նելլի Շահնազարյանը հեղինակ է հինգ գրքի: Նրա պիեսներից բեմադրվել են Գ. Սունդուկյանի անվան ազգային ակադեմիական թատրոնում, Վանաձորի Հ. Աբելյանի անվան պետական դրամատիկական թատրոնում, Թեհրանի թատերական համալսարանում, Հունգարիայի մայրաքաղաք Բուդապեշտում: Նրա պատմվածքները թարգմանվել են 13 լեզվով: Գիրքը հրատարակել է «Էդիթ Պրինտ»-ը:

Պատկերագիրք բանաստեղծություններով

Շմավոն Շմավոնյան, «Արարատ»

Գիրքն ընդգրկում է Շմավոն Շմավոնյանի այն ստեղծագործությունները, որոնք նա հեղինակել է 1993-2013թթ.: Պատկերագրքում Արարատ լեռը և հայրենական բնությունը պատկերող կտավներին զուգահեռ հայ և օտարազգի բանաստեղծների քառատողեր են զետեղված՝ նվիրված սրբազան լեռանը, որը ներշնչանքի աղբյուր է եղել բազմաթիվ նկարիչների, գրողների և արվեստի այլ բնագավառների ներկայացուցիչների համար: Գրքում պատմվում է նաև նկարչի կենսագրության հետաքրքիր դրվագները: Այն հրատարակել է «Էդիթ Պրինտ»-ը:

«Նոր գիրք»-ը ներկայացրեց Ռոզա Գրիգորյանը