ՌԴ-ի եւ Չինաստանի ղեկավարները հայտարարել են ԵԱՏՄ-ի եւ Մետաքսի ճանապարհի միակցման մասին

ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ: Ռուսաստանի նախագահ Վլադիմիր Պուտինը եւ Չինաստանի Ժողովրդական Հանրապետության նախագահ Սի Ցզինպինը մայիսի 8-ին Կրեմլում կայացած բանակցությունների արդյունքում համատեղ հայտարարություն են ընդունել Եվրասիական տնտեսական միության եւ «Մետաքսի ճանապարհի տնտեսական գոտի» անդրեվրասիական առեւտրա-ենթակառուցվածքային ծրագրի միակցման վերաբերյալ, տեղեկացնում Է «Արմենպրես»-ը՝ հղում անելով ՌԻԱ Նովոստիին:

Ինչպես ավելի վաղ լրագրողներին հայտնել Է Ռուսաստանի նախագահի մամուլի քարտուղար Դմիտրի Պեսկովը, Մոսկվան եւ Պեկինը մտադիր են այս երկու ծրագրերի իրագործման ուղղությամբ «գործել համադաշն»: Նրա խոսքով՝ դա «մեր երկկողմ հարաբերությունների շատ հետաքրքրական, նոր ռազմավարական սուբստանցիա Է»:

Նոր Մետաքսի ճանապարհի կառուցման գաղափարը, ճանապարհ, որը պետք Է Չինաստանը միացնի Եվրոպայի երկրների հետ, ամրապնդի համագործակցությունն Ասիայի եւ Աֆիկայի հետ, Սի Ցզինպինն առաջադրել Է տակավին 2013 թվականին: Խոսքը վերաբերում Է Արեւելքից Արեւմուտք արտոնյալ պայմաններով ապրանքների ուղղակի մատակարարումների համար առեւտրամիջանցքի ստեղծմանը:

Նախագահ Պուտինը, ելույթ ունենալով ՉԺՀ-ի նախագահ Սի Ցզինպինի հետ բանակցությունների արդյունքներին նվիրված մամուլիս ասուլիսում, հայտարարել Է, որ կողմերի համագործակցությունը հեռանկարում կարող Է բերել ամբողջ մայրցամաքում ընդհանուր տնտեսական տարածքի ձեւավորման: Նա նշել Է, որ ԵԱՏՄ-ն եւ Չինաստանի առաջարկած «Մետաքսի ճանապարհի տնտեսական գոտի» նախագիծը կարող են ներդաշնակորեն լրացնել միմյանց:

Լուսանկարը` kremlin.ru