2 րոպեի ընթերցում
ԵՐԵՎԱՆ, 29 ԱՊՐԻԼԻ, ԱՐՄԵՆՊՐԵՍ: Գերմանական «Բավարիա»-ի գլխավոր մարզիչ Պեպ Գվարդիոլայի կարծիքով, հենց Հենրիխ Մխիթարյանի փոփոխությունն էր, որ փոխեց ամբողջ հանդիպման ընթացքը:
«Մենք արեցինք հնարավոր ամեն բան, ինչ կարող էինք: Անձամբ գոհ եմ իմ թիմից: Խաղում խնդիրներ ստեղծվեցին, երբ փոխարինման դուրս եկավ Հենրիխ Մխիթարյանը: Սա Լավագույն հանդիպումն էր, որ տեսել եմ «Բավարիա»-ի և «Բորուսիա»-ի միջև: Շնորհավորում եմ «Բորուսիա»-ին եւ հաջողություն եմ մաղթում եզրափակիչում»,-«Արմենպրես»-ի հաղորդմամբ, Գվարդիոլայի խոսքը մեջ է բերում «Բավարիա»-ի պաշտոնական կայքը:
Հայաստանի ֆուտբոլի ազգային թիմի անդամ Հենրիխ Մխիթարյանը մեկնարկային կազմում չէր, բայց փոխարինման դուրս եկավ 70-րդ րոպեին: Փոխարինման դուրս գալուց հետո հայ կիսապաշտպանը դարձավ գոլային փոխանցման հեղինակ: Նրա փոխանցումից հետո Պիեռ-Էմերիկ Օբամեյանգը հավասարեցրեց հաշիվը: Խփած գնդակից հետո դորտմունդցիները սկսեցին տիրել խաղային իրավիճակին: Ի վերջո հանդիպումը տեղափոխվեց լրացուցիչ ժամանակ, որտեղ նույնպես դարպասի գրավում չարձանագրվեց: Նշանակված 11-մետրանոց հարվածներն ավելի դիպուկ իրացրեցին «Բորուսիա»-ի ֆուտբոլիստները:
Գերմանիայի գավաթի խաղարկության երկրորդ կիսաեզրափակիչը կկայանա ապրիլի 29-ին, որտեղ կմրցի «Արմինիա»- «Վոլֆսբուրգ» զույգը: Իսկ ահա գավաթի խաղարկության եզրափակիչը կկայանա մայիսի 30-ին Բեռլինի «Օլիմպիա» մարզադաշտում: