2 րոպեի ընթերցում
ՍՏԱՄԲՈՒԼ, 24 ԱՊՐԻԼԻ, ԱՐՄԵՆՊՐԵՍ: Ստամբուլի Սուլթան Ահմեդ հրապարակից հարյուրավոր հայեր Հայդարփաշա կայարանի մոտ հիշատակեցին Ցեղասպանությանը զոհ գնացած հայ մտավորականների հիշատակը: Նրանց թվում ԱՄՆ նախագահին լուսանկարելով հայտնի Սկաուտ Թուֆանկջյանն է: «Այսօր այստեղ լինելն իրոք անբացատրելի մի զգացողություն է: Ես կարծում եմ, որ մեզ համար այսօր այստեղ՝ Ստամբուլում լինելն իրոք անչափ կարևոր է այն տեսանկյունից, որ այսպիսով մենք ցույց ենք տալիս, որ ոչնչացված, վերացած ժողովուրդ չենք: Միաժամանակ, կարևոր էր նաև անցնող օրերի ընթացքում լսելը, թե ինչպես են թուրքերն ու քրդերը խոսում այն մասին, որ Հայոց ցեղասպանության ճանաչումը հատկապես կենսական անհրաժեշտություն է հենց իրենց համար»,- «Արմենպրես»-ի հետ զրույցում նշեց արարողությանը մասնակցող հայտնի հայ լուսանկարիչ Սկաուտ Թուֆանկջյանը:
Արարողության անցկացման վայրի ընտրությունը պատահական չէր, քանի որ հենց Ստամբուլի եվրոպական հատվածից այստեղ էին բերել և այնուհետ երկրի խորքերն էին քշել հայ մտավորականներին: Ինչպես հաղորդում է «Արմենպրես»-ի թղթակիցը, Ստամբուլից, հայ մտավորականների նկարները ձեռքներին մասնակիցները նախ նստեցին կայարանի շենքի առջև, որից հետո մեկ առ մեկ հնչեցվեցին Ցեղասպանությանը զոհ գնացած հայ մտավորականների անունները: «Ոչնչացված աշխարհն անհնար է վերականգնել, սակայն ճանաչումը կթեթևացնի ցավը: Մենք կոչ ենք անում ճանաչել Հայոց ցեղասպանությունը, ներողություն խնդրել կատարվածի համար և փոխհատուցել» ,-իր ելույթում նշեց թուրք իրավապաշտպան Էրեն Քեսքինը:
Մասնակիցները մեկ րոպե լռությամբ հարգեցին զոհված հայ մտավորականների հիշատակը: