2 րոպեի ընթերցում
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: Այս օրերին Երեւանում է բոլոր ժամանակների երեւելի արվեստագետներից մեկի՝ Արամ Խաչատրյանի որդին՝ Կարեն Խաչատրյանը: Ապրիլի 16-ին Կարեն Խաչատրյանն այցելել է Պանթեոն, ծաղիկներ խոնարհել մեծ հայի եւ կոմպոզիտորի շիրմին, ապա նրան հյուրընկալել է ոստիկանության պետ Վլադիմիր Գասպարյանը:
«Այցի նպատակը բացառիկ էր, հուզիչ եւ, կարելի է ասել, պատմական. Կարեն Խաչատրյանը Հայաստանի ոստիկանությանը նվիրեց մեծ կոմպոզիտորի հեղինակած քայլերգը: Ոստիկանության պետ Վլադիմիր Գասպարյանը երախտագիտություն հայտնելով թանկ պարգեւի կապակցությամբ՝ կարեւորել է քայլերգի նշանակությունը նորացող ոստիկանության համար:
Ջերմ ընդունելության եւ գնահատանքի համար շնորհակալական խոսքով հանդես է եկել Կարեն Խաչատրյանը եւ Վլադիմիր Գասպարյանին հանձնել ոստիկանության քայլերգի նոտաները»,- «Արմենպրես»-ի հաղորդմամբ՝ ասված է ՀՀ ոստիկանության լրատվական ծառայության հաղորդագրության մեջ:
Հանդիպման ընթացքում ոստիկանության պետի հրամանով Կարեն Խաչատրյանը պարգեւատրվել է «Համագործակցության ամրապնդման համար» մեդալով:
Վլադիմիր Գասպարյանի մեկ այլ հրամանով՝ ոստիկանության զինանշանը կրող ժամացույցով է պարգեւատրվել ՀՀ նախագահի խորհրդական Արմեն Սմբատյանը:
Հյուրերին հանձնվել են խորհրդանշական հուշանվերներ:
Իսկ հանդիսության ավարտին առաջին անգամ հնչել է Արամ Խաչատրյանի «Ոստիկանության քայլերգը»: