Կոռուպցիայի վերացումը դատախազության գերնպատակներից է. Գևորգ Կոստանյանն ընդունել է GRECO-ի պատվիրակությանը
2 րոպեի ընթերցում
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: «Կոռուպցիայի դեմ պայքարի խմբի GRECO» մոնիտորինգային գործընթացի շրջանակներում ընթացքի մեջ է Հայաստանի վերաբերյալ GRECO-ի գնահատման 4-րդ փուլը: «Կոռուպցիայի կանխարգելումը խորհրդարանի անդամների, դատավորների և դատախազների շրջանում» թեմայի շրջանակներում ՀՀ գլխավոր դատախազն ընդունել է GRECO-ի պատվիրակությանը: Ինչպես «Արմենպրես»-ին տեղեկացրին ՀՀ գլխավոր դատախազությունից, Գևորգ Կոստանյանն ընդգծել է, որ որպեսզի հասարակությունն անվերապահ վստահի համակարգին, անհրաժեշտ է ամենօրյա հետևողական աշխատանք: Դատախազությունը կոռուպցիայի դեմ պայքարը սկսել է առաջին հերթին հենց դատախազության համակարգից: Կոռուպցիայի վերացումը դատախազության գերնպատակներից մեկն է:
ՀՀ գլխավոր դատախազը նշել է, որ պաշտոնատար անձանց կողմից կաշառք վերցնելու վերաբերյալ հարուցված գործերն իր անմիջական վերահսկողության և մշտական ուշադրության կենտրոնում են, և կարող ենք փաստել, որ վերջին շրջանում դրական տեղաշարժը ակնհայտ է:
Հանդիպման ընթացքում, ի թիվս այլ հարցերի քննարկվել են դատախազներին կարգապահական պատասխանատվության ենթարկելու, դատախազության էթիկայի և որակավորման հանձնաժողովների գործունեության կարգին, դատախազների գույքի և եկամուտների հայտարարագրմանն առնչվող հարցեր:
Հանդիպման ավարտին GRECO-ի ներկայացուցիչները շնորհակալություն են հայտնելբաց, արդյունավետ և հետաքրքիր քննարկման համար: