Կոնգրեսական Էդ Ռոյսը կոչ է արել Բարաք Օբամային և Թուրքիային ճանաչել Հայոց ցեղասպանությունը

ՎԱՇԻՆԳԹՈՆ, 15 ԱՊՐԻԼԻ, ԱՐՄԵՆՊՐԵՍ: ԱՄՆ Ներկայացուցիչների պալատի արտաքին հարաբերությունների հանձնաժողովի նախագահ Էդ Ռոյսը հայտարարություն է արել Հայոց ցեղասպանության 100-րդ տարելիցին ընդառաջ: Ինչպես հաղորդում է «Արմենպրես»-ը` վկայակոչելով «Ասպարեզ» պարբերականը, կոնգրեսականը կոչ է արել ԱՄՆ նախագահ Բարաք Օբամային և Թուրքիային ճանաչել Հայոց ցեղասպանությունը:

«100 տարի առաջ Օսմանյան իշխանություններն սկսեցին հայ համայնքի դեմ հարձակման իրենց հաշվարկները: Բազմաթիվ մարդկանց սառնասիրտ և համակարգված բնաջնջումը և միջազգային հանրության անտարբերությունը նախադեպ ստեղծեցին 20-րդ դարի մյուս ցեղասպանությունների առաջնորդների համար: Նման սարսափների համար չկա վաղեմության ժամկետ: Այս ոճրագործությունները փոխհատուցելու անհրաժեշտությունը այսօր էլ շարունակում է այնքան ուժգին լինել, որքան 1915 թվականին: Նահատակված 1.5 մլն անմեղ տղամարդկանց, կանանց և երեխաների հիշատակը ճանաչում է պահանջում:

Կոչ եմ անում նախագահ Օբամային այդ ողբերգական իրադարձություններն ընդունել այնպես, ինչպես որ դրանք եղել են` 20-րդ դարի առաջին ցեղասպանություն: Կոչ եմ անում նաև Թուրքիային հաշտվել իր պատմության այս մութ էջի հետ` իր ժողովրդի մեջ ձգձգվող լարվածությունը ամոքելու, Հայաստանի հետ հարաբերությունները բարելավելու և տարածաշրջանի կայունությանը խթանելու համար»,- մասնավորապես նշել է կոնգրեսականը:

Ներկայացուցիչների պալատի անդամ Ռոյսը ԱՄՆ Կոնգրեսում Հայաստանի աջակցության խմբի ակտիվ անդամ է: Այս ամսվա սկզբին նա մի քանի կոնգրեսականների հետ նամակ է հղել Բարաք Օբամային` հորդորելով 100-րդ տարելիցին ճանաչել Հայոց ցեղասպանությունը: 2014 թվականի ապրիլին նա գլխավորել է Հայաստան այցելած կոնգրեսականների պատվիրակությունը: Այցելել Ծիծեռնակաբերդ և ծաղկեպսակ դրել ցեղասպանության զոհերի հիշատակի հուշահամալիրում: