2 րոպեի ընթերցում
ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: Ամերիկահայ անվանի Քարդաշյանների ընտանիքի և Քիմ Քրադաշյանի ամուսնու` հայտնի ռեփեր, «Գրեմիի» բազմակի դափնեկիր Քանյե Ուեսթիմի քանի երկրպագուներ Change.org կայքում բացել են խնդրագիր` Քանյե Ուեսթից խնդրելով Հայաստան կատարած այցի շրջանակներում հանդես գալ համերգով:
«Մեր փեսա Քանյե Ուեսթը Հայաստանում է, և նրա Հայաստանի այցը հիշելու ավելի լավ միջոց չկա, քան համերգը: Մենք ցանկանում ենք մեր փեսային հրավիրել` համերգով հանդես գալ` ցույց տալու, թե ինչ է նշանակում խախտել կանոնները և կոտրել կարծրատիպերը, ինչպես նաև տոնել հայերի վերածնունդը»,- «Արմենպրես»-ի փոխանցմամբ՝ասվում է խնդրագրում:
Քարդաշյան երկու քույրերը, Քայնե Ուեսթը և փոքրիկ Նորֆ Ուեսթը Երևան են ժամանել ապրիլի 8-ի երեկոյան: Պատմական հայրենիք կատարած առաջին այցելության առաջին օրը քույրերը շրջել են մայրաքաղաք Երևանով, այցելել պատմաշակութային վայրեր, հանդիպել ՀՀ վարչապետ Հովիկ Աբրահամյանի հետ: Վարչապետի հետ հանդիպմանը նրանք հայտնել են, որ տպավորված են Հայաստանով և մարդկանց ջերմ վերաբերմունքով: Քույրերի խոսքով՝ իրենք երկար ժամանակ երազել են պատմական հայրենիք այցելելու մասին և երջանիկ են, որ գտնվում են իրենց երազանքի երկրում և տեղեկացրել, որ այժմ աշխատում են մայրենի լեզուն սովորելու ուղղությամբ:
Քարդաշյաններն ընդգծել են, որ այսուհետ ևս շարունակելու են ակտիվորեն պայքարել Հայոց մեծ եղեռնի միջազգային ճանաչման ու դատապարտման համար և կարևորել այդ հարցի շուրջ համայն հայության համախմբման գործոնը: