Հայոց ցեղասպանությանը նվիրված ցուցադրություն է տեղի ունեցել Փարիզի Հոլոքոստի հուշահամալիրում

ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: Փարիզի Հոլոքոստի հուշահամալիրում ապրիլի 2-ին տեղի է ունեցել Հայոց ցեղասպանության 100-րդ տարելիցին նվիրված ցուցադրության բացման պաշտոնական արարողությունը՝ Ֆրանսիայում ՀՀ դեսպան Վիգեն Չիտեչյանի և հուշահամալիրի նախագահ Էրիկ դը Ռոթշիլդի գլխավորությամբ: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, նախքան պաշտոնական բացումը, դեսպան Չիտեչյանը հուշահամալիրի ղեկավարության հետ շրջել է ցուցասրահներով՝ ցուցադրության պատասխանատուներ, պատմաբան Իվ Տերնոնի և Կլեր Մուրադյանի ուղեկցությամբ: Այնուհետև հուշահամալիրի ամֆիթատրոնում մեկնարկել է բացման արարողությունը, որին ներկա են եղել ֆրանսիացի քաղաքական գործիչներ, հետազոտողներ, լրագրողներ և հարյուրավոր հյուրեր: Բացման խոսքով հանդես են եկել դեսպան Չիտեչյանը, Էրիկ դե Ռոթշիլդը, Իվ Տերնոնը և Կլեր Մուրադյանը:

Իր խոսքում դեսպան Չիտեչյանն ընդգծել է բացառիկ ցուցադրության կարևորությունը՝ նախաձեռնության համար շնորհակալություն հայտնելով Հոլոքոստի հուշահամալիրի նախագահին և ցուցադրության պատասխանատու հետազոտողներին: Դեսպանն առանձնահատուկ արժևորել է Հոլոքոստի հուշահամալիրի և Հայոց ցեղասպանության թանգարան-ինստիտուտի վերջին տարիներին հաստատված համագործակցությունը` գոհունակությամբ հայտնելով, որ մոտ ապագայում երկու հաստատությունների միջև հարաբերություններն էլ ավելի կխորանան՝ համագործակցության պայմանագրի կնքմամբ:

«Մեր պայքարը քաղաքակրթական պայքար է: Մենք ելնում ենք այն սկզբունքից, որ այս աշխարհում մարդու առաքելությունը վայրագություններ իրականացնելու մեջ չէ: Մեր պայքարն ուղղված է մարդու պատկերի և առաքելության խեղաթյուրման դեմ: Պայքար, որի նպատակն է պաշտպանել մարդկային էությունն ու արժանապատվությունը», - ավարտել է իր խոսքը դեսպանը:

Բացման արարողության պաշտոնական մասի ավարտից հետո ցուցադրվել են Ավրորա Մարդիգանյանի «Խոշտանգված Հայաստան» գրքի հիման վրա 1919թ. նկարահանված «Հոգիների աճուրդ» և պատմավավերագրական «Ցեղասպանության որբեր» ֆիլմերը: Հայոց ցեղասպանությանը նվիրված ցուցադրությունը Հոլոքոստի հուշահամալիրում կշարունակվի մինչև սեպտեմբերի 27-ը: