Ուկրաինայի խորհրդարանում Հայոց ցեղասպանության ճանաչման օրինագիծ է ներկայացվել

ԿԻԵՎ, 3 ԱՊՐԻԼԻ, ԱՐՄԵՆՊՐԵՍ: Ուկրաինայի Գերագույն Ռադային է ներկայացվել թիվ 2530 օրենքի նախագիծը, որը պահանջում է ճանաչել Հայոց ցեղասպանությունը: Ինչպես հաղորդում է «Արմենպրես»-ը` վկայակոչելով «Ինտերֆաքս»-ը, օրինագիծը Գերագույն Ռադա է ներկայացրել է ինքնառաջադրված պատգամավոր Վիտալի Բարվինենկոն, ով ընտրվել է Օդեսայի Տատարբունարի շրջանից եւ «Վիդրոժդենիա» խմբի անդամ է:

Առայժմ օրինագծի տեսքտը Գերագույն ռադայի կայքում բացակայում է:

Օսմանյան կառավարության կողմից իրականացված Հայոց ցեղասպանության փաստը հիմնավորվել է, ճանաչվել ու հաստատվել ականատեսների վկայություններով, օրեքներով, բանաձեւերով եւ բազմաթիվ նահանգների ու միջազգային կազմակերպությունների որոշումներով: 1915թ. Օսմանյան կայսրությունում հայ բնակչության մասայական կոտորածները որպես նախապես ծրագրավորված ու ամբողջությամբ իրագործված ցեղասպանական ակտ որակող փաստաթղթերի ամբողջական շարքը հսկայական է: Հայոց ցեղասպանությունն ընդունել են այնպիսի կազմակերպություններ, ինչպիսիք են Եվրոպայի Խորհուրդը, Եվրախորհրդարանը, ՄԱԿ-ի մի քանի հանձնաժողովներ, Եկեղեցիների համաշխարհային միությունը եւ այլն: Հայոց ցեղասպանությունը ճանաչել են շատ պետություններ. առաջինը պաշտոնապես ընդունել է Ուրուգվայը 1965 թ-ին: Հայ ժողովրդի կոտորածը պաշտոնապես քննադատել եւ ճանաչել են որպես ցեղասպանություն` ըստ միջազգային իրավունքի ավելի քան երկու տասնյակ պետություն: Եւս չորս պետությունում Հայոց ցեղասպանության ժխտումը քրեորեն պատժելի հանցագործություն է: