Հասարակական կազմակերպությունները դրական են գնահատել «ՀԿ-ների մասին» օրենքի փոփոխված տարբերակը

ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: ՀՀ արդարադատության նախարարությունը մարտի 24-ին հրապարակել է «Հասարակական կազմակերպությունների մասին» օրենքի նախագծի փոփոխված տարբերակը:

Օրենքի նախագծի վերաբերյալ ՀԿ-ների կարծիքը պարզելու նպատակով «Արմենպրես»-ը զրուցեց «Քաղաքացիական զարթոնք» ՀԿ նախագահ Տիրայր Մուրադյանի և «Եվրասիա համագործակցություն հիմնադրամ» ՀԿ փաստաբան Արման Խաչատրյանի հետ:

«Հասարարակական կազմակերպությունների մասին» ՀՀ օրենքի նախագծում կոնկրետ ինձ համար ամենադրականը համարում եմ այն, որ այժմ ՀԿ-ները կարող են իրենց իրավաբանների միջոցով (հիմնականում հասարակական հիմունքներով) պաշտպանել իրենց շահառուների իրավունքները դատարանում. նախկինում մենք նման լիազորություն չունեինք: Բացի այդ` ՀՀ արդարադատության նախարարության առաջարկվող նախագծում հասարակական կազմակերպություններին հնարավորություն է ընձեռվում իրականացնել ձեռնարկատիրական գործունեություն կամ վճարովի ծառայություններ մատուցել, ինչը ՀԿ-ներին թույլ է տալիս լուծել ֆինանսական կայունության խնդիրը, որը յուրաքանչյուր հասարակական կազմակերպության գերնպատակն է»,-նշեց «Քաղաքացիական զարթոնք» ՀԿ նախագահ Տիրայր Մուրադյանը:

Նա նկատեց, որ օրենքի նախագծում ՀԿ-ներում կամավորների ներգրավվածության հետ կապված որոշակի փոփոխություններ են կատարվել: «Մեզ մոտ ցանկացած կամավորի առկայությունը հարկային մարմինները կարող են որպես ստվերային աշխատուժ համարել: Այս խնդիրը կարգավորելու համար օրենքի նախագծով առաջարկվում է կամավորներին ներգրավել ոչ թե որպես վարձու աշխատողների, այլ կազմակերպության համար 5 օր անընդմեջ աշխատելու համար, նրա հետ կնքվում է ոչ աշխատանքնային պայմանագիր, և նա այդ օրերի համար վարձատրվում է, ինչը տրամաբանական է»,-շեշտեց Տիրայր Մուրադյանը:

Նա նաև դրական գնահատեց օրենքի նախագծի նախնական տարբերակում առկա պարտադիր աուդիտի վերաբերյալ կետի վերացումը: «Ըստ օրենքի նախագծի նախկին կարգավորման, եթե ես միջազգային որևէ կազմակերպությունից դրամաշնորհ եմ ստանում, ապա պետք է հաշվետու լինեմ ոչ միայն այդ կազմակերպությանը և հարկային մարմիններին, այլև ՀՀ արդարադատության նախարարությանը, ինչն անընդունելի էր»,-ընդգծեց Մուրադյանը և հավելեց, որ պետությանը պարտադիր հաշվետվություն պետք է ներկայացնեն միայն պետական կառույցների տրամադրած ֆինանսական միջոցների դեպքում: «Հասարակական կազմակերպությունների մասին» օրենքի նախագիծը, ընդհանուր առմամբ, դրական եմ գնահատում: Իհարկե, դեռևս որոշակի կետերի շուրջ պետք է աշխատանքներ տարվեն, օրինակ` հասարակական կազմակերպությունների գրանցման հետ կապված մեկ օրինակելի ձևի ընդունումը, որից բոլորը կօգտվեն և նման այլ տեխնիկական խնդիրներ, սակայն, իմ կարծիքով, վերը նշված օրենքի նախագիծը չի խոչընդոտում հասարակական կազմակերպությունների գործունեությանը»,-ասաց նա:

Իր հերթին «Եվրասիա Համագործակցություն Հիմնադրամ» ՀԿ փաստաբան Արման Խաչատրյան նույնպես դրական գնահատելով վերը նշված կետերի ընդունումը`նշեց, որ ՀՀ արդարադատության նախարարության ներկայացուցիչների հետ «Հասարակական կազմակերպությունների մասին» օրենքի նախագծի վերաբերյալ կազմակերպած բոլոր քննարկումները կառուցողական մթնոլորտում են անցել և քննարկումների ժամանակ բարձրացված բոլոր հարցերը ներառվել են նախագծում: «Անշուշտ, օրենքի նախագիծը դեռ պետք է Ազգային ժողովում անցնի քննարկումների և ընթերցումների փուլը, և լավ կլիներ, որ բոլոր շահառուների շահերը հաշվի առնելով` օրենքը շատ չբարդացնի ՀԿ-ների կյանքը` նպաստելով քաղաքական հասարակության հետագա զարգացմանը և ամրապնդմանը»,-հավելեց նա:

2014թվականին նոյեմբերի 18-ին ՀՀ արդարադատության նախարարության հրապարակած «Հասարակական կազմակերպությունների մասին» ՀՀ օրենքի նախնական նախագիծը լուրջ քննադատության առարկա էր դարձել ՀԿ-ների շրջանում: Մասնավորապես` հասարակական կազմակերպությունները շատ դժգոհ էին պարտադիր տարեկան հաշվետվությունը ներկայացնելու պահանջից, որը նրանք համարում էին իրենց գործերին պետական միջամտությունը ուժեղացնելու քայլ: