«Նոր գիրք»-2/7. Խուլիո Կորտասարից մինչև Աստրիդ Լինդգրեն
2 րոպեի ընթերցում
![«Նոր գիրք»-2/7. Խուլիո Կորտասարից մինչև Աստրիդ Լինդգրեն](http://armenpress.am/resized/480/static/news/b/2015/03/797735.jpg)
ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ ծանոթանալ դասական երկերին և արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել:
Այս շաբաթ «Արմենպրես»-ը դարձյալ առանձնացրել է տարբեր հրատարակչությունների նոր հրատարակած և հանրության դատին հանձնած մի շարք ուշագրավ գրքեր՝ տարբեր խորագրերի ներքո:
Թարգմանական գրականություն
Խուլիո Կորտասար, «Այստեղ և հիմա»
Խուլիո Կորտասարը մահվանից ոչ շատ առաջ անձամբ է կազմել այս շարքը՝ ներառելով տարբեր տարիներին գրված պատմվածքներ՝ ըստ թեմատիկ ընդհանրության: Մարդու իրավունքների ոտնահարման դեմ պայքարի ակտիվ մասնակիցը լինելով՝ Կորտասարը չէր կարող անտարբեր մնալ Արգենտինայում իշխող բռնատիրության (1976-1983) և առհասարակ բռնության հանդեպ: «Այստեղ և հիմա» շարքի 9 պատմվածքներն արտահայտում են հեղինակի վրդովմունքը բռնության և խորին համակրանքը դրա դեմ ընդվզող անհատների հանդեպ: Իսպաներենից թարգմանեց՝ Կառա Չոբանյանը: Գիրքը հրատարակել է «Անտարես»-ը:
Մանկական գրականություն
Աստրիդ Լինդգրեն, «Ամեն ինչ տանիքի Կառլսոնի մասին»
Գրքում ընդգրկված են շվեդ հռչակավոր մանկագիր Աստրիդ Լինգրենի (1907-2002) «Ապերիկն ու Տանիքի Կառլսոնը», «Տանիքի Կառլսոնը վերադառնում է» և «Տանիքի Կառլսոնը հայտնվում է նորից» վիպակները: Շվեդերենից թարգմանեց՝ Աշխեն Բախչինյանը: Գիրքը հրատարակել է «Անտարես»-ը:
«Նոր գիրք»-ը ներկայացրեց Ռոզա Գրիգորյանը