«Նոր գիրք»-2/6. Տերյանից մինչև Մաքրասեր խոզուկի հեքիաթը
2 րոպեի ընթերցում
![«Նոր գիրք»-2/6. Տերյանից մինչև Մաքրասեր խոզուկի հեքիաթը](http://armenpress.am/resized/480/static/news/b/2015/03/796855.jpg)
ԵՐԵՎԱՆ, 9 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն ընթերցասերների դատին է հանձնում հայաստանյան հրատարակչությունների լույս ընծայած գեղարվեստական գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի վերաբերյալ, ծանոթանալ դասական երկերին և արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել:
Այս շաբաթ«Արմենպրես»-ը դարձյալ առանձնացրել է տարբեր հրատարակչությունների նոր հրատարակած և հանրության դատին հանձնած մի շարք ուշագրավ գրքեր՝ տարբեր խորագրերի ներքո:
Հայ հեղինակներ
Գ. Էմին Տերյան , «Վահան Տերյան. անտիպ և անհայտ էջեր»
Գ. Էմին Տերյանի ներկայացրած ժողովածուն ամփոփում է Վահան Տերյանի անտիպ և անհայտ նամակները, հոդվածները, գրախոսությունները: Գիրքը հրատարակել է «Տիգրան Մեծ»-ը:
Մանկական գրականություն
Մերի Ադա Շվարց, «Սփիֆեն: Մաքրասեր Խոզուկի հեքիաթը»
Այս պատկերազարդ հեքիաթը հրաշալի խոզուկ Սփիֆենի մասին է, որն ապրում էր Խոզաստանի Փնթոշաքաղաքում: Նա բոլորովին նման չէր քաղաքի մյուս խոզերին. մաքրասեր էր, ճշտապահ, աշխատասեր, հնարամիտ, խիզախ: Ահա Սփիֆենի այդ հատկանիշներն էլ օգնում են փրկելու Փնթոշաքաղաքը Վիշապի հարձակումից: Գիրքը հրատարակել է «Զանգակ»-ը:
«Նոր գիրք»-ը ներկայացրեց Ռոզա Գրիգորյանը