Ցեղասպանության տարելիցին նվիրված միջոցառումներ կկայանան ԱՄՆ Օրինջ վարչական շրջանում
2 րոպեի ընթերցում
ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: Հայոց ցեղասպանության 100-րդ տարելիցին ընդառաջ ԱՄՆ Օրինջ վարչական շրջանում ցեղասպանության անմեղ զոհերի հիշատակին նվիրված միջոցառումներ կկայանան:
Ինչպես հաղորդում է «Արմենպրես»-ը` վկայակոչելով «Ասպարեզ» պարբերականը, ամեն տարի Օրինջ վարչական շրջանի հայ համայնքը որգեկոչում է Մեծ եղեռնի զոհերի հիշատակը և տոնում մեր ժողովրդի փրկությունը: Այս տարի Սուրբ Մարիամ հայկական եկեղեցու` Հայոց ցեղասպանության 100-րդ տարելիցի հիշատակի հանձնաժողովը Հայ Առաքելական եկեղեցու Հյուսիսային Ամերիկայի Արեւմտյան թեմի առաջնորդարանի հովանու ներքո և տարբեր հայկական կազմակերպությունների աջակցությամբ հատուկ ոգեկոչման արարողությունների շարք է կազմակերպել, որը տեղի կունենա մարտի 8-ին: Նախ կկայանա Հայոց ցեղասպանության հայուրամյակին նվիրված նորակառույց հուշարձանի օծման և նվիրաբերման արարողությունը` Հովնան արքեպիսկոպոս Դերդերյանի ձեռամբ: Իսկ ավելի ուշ` «Ռոբերտ Բ. Մուր» թատրոնում տեղի կունենա ոգեկոչման արարողություն:
Օրինջ վարչական շրջանի հայկական համայնքը բոլոր կազմակերպությունների, եկեղեցիների, հայկական դպրոցների և հայ համայնքի բարեկամների հետ կրկին կհավաքվի հարգելու 20-րդ դարի առաջին ցեղասպանության զոհերի հիշատակը` վերահաստատելով հանուն արդարության մղվող պայքարը շարունակելու իր հանձնառությունը: