Հայոց ցեղասպանության տարելիցին նվիրված համերգին մասնակցել են Իրանում հավատարմագրված դեսպանները

ԹԵՀՐԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Հայոց ցեղասպանության 100-րդ տարելիցին ընդառաջ Թեհրանի հայոց թեմի հանձնախմբի նախաձեռնությամբ կազմակերպվել էր Հայոց ցեղասպանության 100-րդ տարելիցին նվիրված համերգ, որին հրավիրած էին՝ Իրանում հավատարմագրված օտարերկրյա բոլոր դեսպանները:

Ինչպես հաղորդում է «Արմենպրես»-ը` վկայակոչելով «Ալիք»-ը, միջոցառմանը ներկա էին Ուրուգվայի, Ֆրանսիայի, Բուլղարիայի, Ճապոնիայի եւ Հայաստանի դեսպանները:

Ուրուգվայի դեսպան Խուան Կառլոս Օխեդան իր խոսքում նշեց. «Ուրուգվայի ժողովուրդը համոզված է, որ Հայոց ցեղասպանության հիշատակմամբ եւ դատապարտմամբ կարելի է կանխել հետագա հնարավոր ցեղասպանությունները: Ցավոք, դեռ աշխարհը շարունակում է ականատեսը լինել մարդկության դեմ շարունակվող վայրագություններին: Ուրուգվայը համոզված է, որ երկխոսությունը եւ մարդկանց միջեւ շփումները կկանխեն կրոնական եւ մշակութային ազգամիջյան ընդհարումները»,- ասել է նա: Միջոցառմանը ցուցադրվել է նաեւ Հայոց ցեղասպանության մասին պատմող կարճամետրաժ ֆիլմ, որից հետո հնչել են Կոմիտասի ստեղծագործությունները: