3 րոպեի ընթերցում
ԵՐԵՎԱՆ, 30 ՀՈՒՆՎԱՐԻ, ԱՐՄԵՆՊՐԵՍ: Հայոց ցեղասպանության 100-րդ տարելիցին նվիրված կայքը հունվարի 30-ից հասանելի է բոլոր հետաքրքրվողներին: Հայոց ցեղասպանության թանգարան-ինստիտուտում կայացած մամուլի ասուլիսիով ազդարարվեց կայքի բացումը: Այս պահին հասանելի են հայերեն, ռուսերեն, անգլերեն տարբերակները, առաջիկա շաբաթներին կայքի նյութերը կլինեն նաև այլ օտար լեզուներով: Կայքը բաղկացած է «Ցեղասպանություն», «Ճանաչում», «Պատմիր քո պատմությունը», «Նորություններ», «Գրադարան» բաժիններից, իսկ յուրաքանչյուր բաժնում առկա են ենթաբաժիններ:«Այս օրը 100 տարի առաջ» խորագիրը կրող հատվածում էլ բոլոր այն նյութերն են, որոնք վերաբերում են Հայոց ցեղասպանության թեմային և տպվել են հայկական ու արտասահմանյան մամուլում:
«Արմենպրես»-ի հաղորդմամբ` «Ցեղասպանություն» բաժինը ներառում է տերմինի սահմանումը, Հայոց ցեղասպանության ժամանակագրության մասին տեղեկատվությունը, նյութեր մշակութային եղեռնի վերաբերյալ: Այդ ենթաբաժնում ներկայացված են հայ միջնադարյան հուշարձանները, որոնք ավերվել են Հայոց ցեղասպանության տարիներին և հաջորդող ժամանակաշրջանում:
«Ճանաչում» բաժնում բոլոր այն պետությունների, կազմակերպությունների մասին տեղեկատվությունն է, որոնք ճանաչել են Հայոց ցեղապանության իրողությունը, ներառված են պահանջագրեր, տարբեր փաստաթղթեր:
«Պատմիր քո պատմությունը» բաժինն էլ թույլ կտա յուրաքանչյուր հայի ներկայացնել ցեղասպանության իր պատմությունը, եթե վերապրել կամ ականատեսն են եղել այդ ողբերգության: Այն ունի նաև կրթական նպատակ` միտումով, որ դպրոցականներն ու ուսանողներն ակտիվորեն կներգրավվեն այդ աշխատանքում` իրենց ընտանիքի պատմությունը ճշտելով ու ներկայացնելով հանրությանը:
Արտերկրում կիրակնօրյա դպրոցներում էլ նախատեսվում է դասեր կազմակերպել, որ տեղի հայ երեխաներն իրենց պատմություններն իրար ներկայացնեն, հետո դրանք պատմեն իրենց օտարազգի ընկերներին: Բացի այդ` ամենահաջող պատմությունները կներկայացվեն սոցիալական հոլովակի տեսքով:
«Գրադարան» բաժնում զետեղված են լուսանկարներ, տեսահոլովակներ, որոնք առնչվում են թեմային: Տեսահոլովակներից մեկն էլ սովորեցնում է պատրաստել Հայոց ցեղասպանության 100-րդ տարելիցի խորհրդանիշը` անմոռուկը: