Թուրքագետն Էրդողանի քայլն անվանում է «ամբարտավանություն»

ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Թուրքիայի Նախագահ Ռեջեփ Թայիփ Էրդողանը կոպտագույն կերպով խախտել էդիվանագիտական էթիկայի նորմերը` ապրիլի 24-ին ՀՀ Նախագահ Սերժ Սարգսյանին հրավիրելով Թուրքիա: «Արմենպրես»-ի հետ զրույցում թուրքագետ Հակոբ Չաքրյանը նշեց, որ Էրդողանը տեղյակ էր, որ ապրիլի 24-ին համայն հայությունը Հայոց ցեղասպանության 100-րդ տարելիցն է ոգեկոչելու, հետեւաբար, նման հրավեր ուղարկելը ստորություն է:

«Սա արդեն էթիկայի բոլոր նորմերի խախտում է: Թուրքիայի Նախագահինապրիլի 24-ին Հայոց ցեղասպանության 100-րդ տարելիցի ոգեկոչման արարողությանըմասնակցելուհրավեր ուղարկելով` Սերժ Սարգսյանը գնդակը կրկին գցել էր թուրքերի դաշտը: Հիմա Էրդողանը քայլ է ուզում անել` տակից դուրս գալու համար: Սա նախաձեռնությունը Սերժ Սարգսյանի ձեռքից վերցնելու ոչ այնքան խելամիտ քայլ է: Թուրքիայի Նախագահը մրցության մեջ է մտել Սարգսյանի հետ: Բայց այս անգամ Էրդողանի քայլը կարելի է մեկ բառով անվանել` ամբարտավանություն»,- շեշտեց Չաքրյանը` հավելելով, որ հրավիրելիս Էրդողանը շատ լավ գիտեր, որ Սերժ Սարգսյանը չի գնա Թուրքիա:

«Չեմ կարծում, որ միջազգային մամուլը, կազմակերպությունները դրական արձագանքեն Էրդողանի այս հայտարարությանը, այս ամբարտավան քայլին: Եթե բացասական արձագանքեն, Թուրքիայի Նախագահն ավելի վատ վիճակում կհայտնվի: Սա վիրավորական քայլ է, քանի որ Դարդանելի ծովամարտին հայ զինվորները զենքը ձեռքին կռվում էին անգլիացիների, ֆրանսիացիների դեմ, իսկ նրանց ընտանիքների անդամներին թուրքերը մորթում էին»,- ասաց Չաքրյանը` հավելելով, որ Էրդողանը լավ խորհրդականների կարիք ունի:

Թուրքիայի Նախագահ Ռեջեփ Թայիփ Էրդողանը, ի թիվս այլ երկրների ղեկավարներին ուղարկած հրավերների, ապրիլի 24-ին Թուրքիա է հրավիրել ՀՀ Նախագահ Սերժ Սարգսյանին` տոնելու Գալիպոլիի (Չանաքքալե) հաղթանակի 100-րդ տարին: