4 րոպեի ընթերցում
ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ձեզ ներկայացնել «Նոր գիրք» նախագիծը: Այն ամեն երկուշաբթի ձեր դատին է հանձնում հայաստանյան հրատարակչությունների լույս ընծայած գեղարվեստական գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի վերաբերյալ, ծանոթանալ դասական երկերին և արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել:
Այս շաբաթ «Արմենպրես»-ը դարձյալ առանձնացրել է տարբեր հրատարակչությունների նոր հրատարակած և հանրության դատին հանձնած չորս ուշագրավ գրքեր՝ չորս խորագրերի ներքո:
Հայ դասական գրականություն
Վահան Թեքեյան, բանաստեղծություններ
«Իմ գրադարանը» մատենաշարը ներկայացնում է հայ բանաստեղծ Վահան Թեքեյանի բանաստեղծությունների ժողովածուն։ Հայ բանաստեղծության հարուստ աշխարհում իրենց ուրույն ու չքնաղ երանգներն ունեն Վ. Թեքեյանի ստեղծագործություները։ Նա Եղեռնից փրկված հայ այն լավագույն ստեղծագործողն է, ով բարձր պահեց ապագայի հավատը և իր ստեղծագործություններում արծարծեց կենսուրախության ու հերոսության գաղափարները: Խմբագիր՝ Աշոտ Գաբրիելյան: Գիրքը հրատարակել է «Էդիթ Պրինտ»-ը:
Ժամանակակից գրականություն
Գևորգ Գիլանց, «ARS-մետա»
Ժողովածուն տարասեռ ժանրերով, տարբեր կառույցներով ու պատումի տարաբնույթ խաղարկումներով ամբողջացող կենսատարածք է: Ավելի քան 10 տարի տևած գրական իր լռությունը Գևորգ Գիլանցը փոխհատուցում է բոլորովին նոր հուն մտած և ինքնատիպ մտածողության որակով՝ թե՛ բանաստեղծական տեքստերում, թե՛ արձակ պատումներում: Գիրքը հրատարակել է «Անտարես»-ը:
Թարգմանական գրականություն
Դաթո Տուրաշվիլի, «Ջինսի սերունդը»
Նրանք հոգեպես խեղդամահ էին լինում ԽՍՀՄ-ում, նրանց Ամերիկան էր ձգում և ազատությունը: Եվ այնտեղ հասնելու համար վրացի երիտասարդները պատրաստ էին վտանգել անգամ իրենց կյանքը: Իրական փաստերի հիման վրա գրված այս վեպը ԽՍՀՄ վերջին տարիներին այսպես կոչված՝ «ջինսի սերնդի» ձգտումների, երազանքների և խորտակված պատրանքների դրամատիկ պատմությունն է: Վրացերենից թարգմանեց՝ Էսմերալդա Երիցյանը: Գիրքը հրատարակել է «Անտարես»-ը:
Մանկապատանեկան գրականություն
Ջաննի Ռոդարի, «Երկնագույն նետը»
Ըստ իտալական լեգենդի՝ ամեն տարի՝ Աստվածահայտնության տոնին, Բեֆանան տնետուն է շրջում և երեխաներին նվերներ բաժանում: Ջաննի Ռոդարիի այս գողտրիկ պատմության մեջ պառավ Բեֆանան խաղալիքների փոքրիկ խանութ ունի: Խաղալիքները, ցուցափեղկին կանգնած, հետևում են ձյունապատ փողոցի անցուդարձին՝ հնազանդ իրենց «լարովի» ճակատագրին ու խանութի քմահաճ տիրուհու կամքին: Սակայն հայտնության գիշերը նրանք կենդանություն են առնում, նստում «Երկնագույն նետ» անունով հրաշալի գնացքը և որոշում իրենք իրենց նվիրել այն երեխաներին, որոնց խեղճ ծնողները չեն կարող զավակների համար նվերներ գնել: Երկնագույն նետի ուղևորները դառնում են սիրո, անձնազոհության և համերաշխության հրաշալի օրինակ փոքրիկ ընթերցողների համար: Թարգմանությունը` Վահե Հակոբյանի: Գիրքը հրատարակել է «Զանգակ»-ը:
«Նոր գիրք»-ը ներկայացրեց Ռոզա Գրիգորյանը