2 րոպեի ընթերցում
ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի շախմատի հավաքականի առաջատար Լևոն Արոնյանը միաժամանակյա սեանս-հանդիպում անցկացրեց Հայաստանի պետական կառավարման ակադեմիայի ուսանողների հետ:
Մինչ շախմատասերները և Արոնյանը բլից հանդիպում կանցկացնեին, մյուս ուսանողներն իրենց հետաքրքրող հարցերը տվեցին գրոսմայստերին: Ուսանողներին հետաքրքրող հարցերից էր, թե որն է Արոնյանի ամենահիշարժան պարտիան կամ հաղթանակը: Գ րոսմայստերը պատմեց, որ իր համար ամենահիշվող պահը 10 տարեկանում տոնած հաղթանակը և Հայաստանի չեմպիոն դառնալն է:
«Այն գիրքը, որով շախմատն ուսուցանվում է դպրոցներում, այնքան էլ հաջող չէ: Գիրքը գրողը մեզ շատ մոտ կանգնած մարդ է, սակայն հին գրքերն ավելի լավն են: Շախմատը երեխային սովորեցնում է, որ կյանքը արդար չէ, դա կարևոր է»,-«Արմենպրես»-ի հաղորդմամբ, «Շախմատ» դասագրքի մասին իր կարծիքը հայտնեց Արոնյանը:
Ակադեմիայի մեկ այլ ուսանողի այն հարցին, թե արդյոք Արոնյանն օգտվո՞ւմ է մրցակցի վրա հոգեբանորեն ազդելու հնարքից, Արոնյանը խոստովանեց` այո. «Հոգեբանորեն առավելություն ստանալը խաղի մի մասն է: Կարևոր է անգամ այն, թե ինչպես շարժեցիր ձեռքդ կամ ինչպես ես բռնում խաղաքարը: Հայտնի պատմություն է` աշխարհի գավաթի խաղարկության ժամանակ իմ և Էտիեն Բաքրոյի պարտիայում դիրքը ոչ-ոքի էր, սակայն ես համոզված էի, որ հաղթելու եմ: Իսկ գրիչս չէր գրում, ևս մեկ գրիչ փորձելուց հետո, որը նույնպես չէր գրում, Բաքրոն իմ վստահությունից ազդված անձնատուր եղավ»,-ասաց Արոնյանը:
Միաժամանակյա սեանսին մասնակցեցին ակադեմիայի 11 շախմատասեր ուսանողներ և աշխատակիցներ: