Քաղաքագետն անհրաժեշտ է համարում Ռոբերտ Ուոլտերի ԼՂ հարցով զեկույցի վերնագրի փոփոխությունը

ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ։ Քաղաքագետ Լևոն Մելիք-Շահնազարյանն անհեռանկարային է համարում Եվրախորհրդի խորհրդարանական վերահողովի կողմից «Լեռնային Ղարաբաղում և մյուս օկուպացված տարածքներում իրավիճակի սրացման հարցերով» զեկույցի վերնագրի ընտրությունն ու կառույցին առաջարկում փոխել այն: Լրագրողների հետ հոկտեմբերի 16-ին կայացած հանդիպմանը քաղաքագետը նկատեց, որ զեկուցող նշանակված Ռոբերտ Ուոլտերի կողմից նման վերնագրով զեկույցի պատրաստումը խանգարում է բանակցային գործընթացին։ «ԵԱՀԿ Մինսկի խմբի համանախագահները աշխատում են Լեռնային Ղարաբաղի կարգավիճակի հարցով և, երբ ԵԽԽՎ-ն իր զեկույցի վերնագրում օկուպացված տարածքներ է հիշատակում, դրանով նա խաչ է քաշում ոչ միայն Մինսկի խմբի համանախագահների աշխատանքի, այլև ողջ բանակցային գործընթացի վրա»,- «Արմենպրես»-ի հաղորդմամբ՝ ասաց նա և հավելեց, որ Ռոբերտ Ուոլտերի մուտքը Հայաստան Հանրապետություն և Լեռնային Ղարաբաղի Հանրապետություն պետք է արգելել (Լեռնային Ղարաբաղի Հանրապետությունը արդեն հայտարարել է այդ մասին), քանի որ նրա մուտքը կնշանակի, որ մենք համաձայն ենք այդ վերնագրի ձևակերպմանը, ինչը մեզ համար անընդունելի է։

Փորձագետը նշեց, որ ԵԽԽՎ-ում Հայաստանի պատվիրակությունն արել է հնարավոր ամեն ինչ այս որոշման դեմ։ «Այս որոշումը նախապես էր ընդունված և մեր պատվիրակությունը մեղք չունի, որ ընդունվել է նման որոշում։ Մեր գերատեսչությունները պետք է անեն հնարավոր ամեն բան, որ այդ զեկույցի վերնագիրը փոխվի, հակառակ դեպքում՝ մենք պետք է դուրս գանք ԵԽԽՎ-ից»,- ասաց նա և հավելեց, որ ինքը ունի համապատասխան փաստաթղթեր, որոնք ապացուցում են Ադրբեջանի ագրեսիան Լեռնային Ղարաբաղի դեմ և դրանք զետեղել է ռուսերեն և անգլերեն լեզուներով վերջերս հրատարակված իր գրքում։

2014թ. հոկտեմբերի 2-ին Մեծ Բրիտանիայի և Հյուսիսային Իռլանդիայի Միացյալ Թագավորության պատգամավոր և բրիտանական պատվիրակության ղեկավար Ռոբերտ Ուոլտերը նշանակվել է Լեռնային Ղարաբաղի իրադրության սրացման հարցերով Եվրախորհրդի խորհրդարանական վեժահաժողովի զեկուցող։ ԼՂ հարցով ԵԽԽՎ զեկուցողի պաշտոնի մյուս թեկնածուն` ԵԱՀԿ Մինսկի խմբի Ֆրանսիայի նախկին համանախագահ Ժան Կլոդ Մինյոնը, վերջնական արդյունքում չի նշանակվել այդ պաշտոնում:

ԼՂՀ նախագահի մամուլի քարտուղար Դավիթ Բաբայանը, մեկնաբանելով ԵԽԽՎ-ի որոշումը, նշել է, որ զեկույցի վերնագիրն արդեն կանխակալ է: Նրա խոսքով` այդ զեկույցից հազիվ թե հնարավոր լինի օբյեկտիվություն սպասել, եւ իրենք կարգելեն զեկուցողի մուտքն Արցախ: