«Նոր գիրք»-7. Ցանկացած ընթերցողի ճաշակը բավարարող հրատարակություններ
4 րոպեի ընթերցում
![«Նոր գիրք»-7. Ցանկացած ընթերցողի ճաշակը բավարարող հրատարակություններ](http://armenpress.am/resized/480/static/news/b/2014/09/775287.jpg)
ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ձեզ ներկայացնել «Նոր գիրք» նախագիծը: Այն ամեն երկուշաբթի ձեր դատին է հանձնում հայաստանյան հրատարակչությունների լույս ընծայած գեղարվեստական գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Թեև ամառն արդեն ավարտվել է, սակայն համոզված ենք, որ կկարողանաք ազատ ժամանակ գտնել և նոր գիրք ընթերցել: Գրքերը կարող եք ընտրել հենց մեր ցանկերից:
Այս շաբաթ «Արմենպրես»-ը կրկին առանձնացրել է տարբեր հրատարակչությունների նոր հրատարակած և հանրության դատին հանձնած չորս ուշագրավ գրքեր՝ չորս խորագրերի ներքո:
Հայդասականգրականություն
Ալեքսանդր Շիրվանզադե, «Քաոս»
«Իմ գրադարանը» մատենաշարի այս հատորով լույս է տեսել Ալեքսանդր Շիրվանզադեի «Քաոս» վեպը: «Քաոս» վեպը Շիրվանզադեն գրել է «մի գերդաստանի ընտանեկան խռովության տպավորության տակ», ինչպես ինքն է ասել տարիներ անց: Նա մեծ հոգեբանի պես քննել է մարդկային ողբերգության պատճառներն ու ակունքները, տեսել հոգեբանական բարդ երևույթների արտաքին ազդակները, սոցիալական հիմքերը: Այս վեպը հայ քննադատական ռեալիզմի լավագույն նմուշներից է թե՛ գեղարվեստական և թե՛ գաղափարական առումով: Կազմող՝ Նվեր Վիրաբյան: Գիրքը բաղկացած է 484 էջից: Այն հրատարակել է «Էդիթ Պրինտ»-ը:
Ժամանակակիցգրականություն
Էդուարդ Խաչիկյան, «Հավերժական պտույտ»
«Հավերժական պտույտ» բազմաժանր ժողովածուն առանձնանում է խիտ պատումով, ուր հերոսները գործում են զգայական-պատրանքային դաշտում, ուր երևակայականի մեջ գոյանում է մի նոր իրականություն՝ կյանքի մութ կողմերը բացահայտելով: Գիրքը բաղկացած է 208էջից: Այն հրատարակել է «Էդիթ Պրինտ»-ը:
Թարգմանական գրականություն
Միշել Ուելբեք, «Տարրական մասնիկները»
«Տարրական մասնիկները» վեպը թեժ և բուռն բանավեճերի ալիք է բարձրացրել հանրության լայն շրջաններում երկու հազարամյակների սահմանագծին՝ զգլխիչ հանդգնությամբ քողազերծելով «արևմտյան աշխարհի» մերօրյա զեխ, ցոփ ու շվայտ կենսափիլիսոփայության կործանարար ախտերը: Ֆրանսերենից թարգմանել է Սերգեյ Մկրտչյանը: Գիրքը բաղկացած է 368 էջից: Այն հրատարակել է «Անտարես»-ը:
Մանկականգրականություն
Նաիրա Եդիգարյան, «Իմ տատիկ Թամթիմարիան»
Փոքրիկ տղան իր երևակայությամբ երկնքից պոկում է մի աստղ, աստղը դարձնում է կանաչ կղզի, իսկ կղզու բնակչուհին նրա տատիկն է՝ քաղաքի փոշուց ձանձրացած տատիկ Թամթիմարիան՝ իր անչափ բարի բնավորությամբ և կարկանդակների գաղտնի բաղադրատոմսով: Չաղլիկ չար Կորյունը և մյուսները չեն պատկերացնում, թե որքան մեծ է իրենց դասընկերոջ երևակայությունը:Նրանք կպատժվեն երևակայական պոետների աշխարհում, բայց տատիկ Թամթիմարիայի կղզում կհաղթի ընկերությունը: Վկաները շատ են՝ անվերջ փոխակերպվող կենդանի Շոկոլակը, Պռաուպռաու առյուծը, օձ Ֆշֆշիկը: Գիրքը բաղկացած է 80 էջից: Այն հրատարակել է «Զանգակ»-ը:
«Նորգիրք»-ըներկայացրեցՌոզաԳրիգորյանը