ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Հավաքական անվտանգության պայմանագրի կազմակերպության երկրների պաշտպանության նախարարների խորհրդի նիստի մասնակիցները հունիսի 10-ին Մոսկվայում պայմանավորվել են զարգացնել կազմակերպության ռազմական բաղադրիչը: Այդ մասին, ինչպես տեղեկացնում է «Արմենպրես»-ը, հայտնել է Ռուսաստանի պաշտպանության նախարար Սերգեյ Շոյգուն:
«Մենք կարծիքներ փոխանակեցինք ռազմաստրատեգիական դրության եւ այն իրադրության շուրջ, որն ստեղծվել է ՀԱՊԿ-ի պատասխանատվության գոտում, այդ թվում՝ ընդհանուր միջազգային միտումների զարգացման, ինչպես նաեւ վերջին ամիսներին հարակից տարածաշրջաններում տեղի ունեցած իրադարձությունների ազդեցության ներքո,-ասել է նա:-Նաեւ քննարկեցինք ՀԱՊԿ-ի ձեւաչափով ռազմական համագործակցության հարցերը, նախանշեցինք կազմակերպության ռազմական բաղադրիչի զարգացման նպատակով հետագա աշխատանքի ուղղությունները»:
Շոյգուն շնորհակալություն Է հայտնել միջազգային անվտանգության հարցերին նվիրված ամենամյա մոսկովյան խորհրդաժողովի մասնակիցներին, որը տեղի Է ունեցել մայիսի վերջին: «Շնորհակալություն բոլորին, ովքեր կարողացան գալ Մոսկվա եւ ելույթ ունենալ խորհրդաժողովում: Ձեր մասնակցությունը լուրջ ավանդ Է ներդնում միջազգային անվտանգության հրատապ խնդիրների քննարկման գործում»,-ասել Է նախարարը, հաղորդել Է ԻՏԱՌ-ՏԱՍՍ-ը: