Սահմանադրական բարեփոխումների վերաբերյալ Ռոբերտ Քոչարյանի տեսակետը համընկնում է ԲՀԿ դիրքորոշման հետ. Գագիկ Մինասյան

ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետության երկրորդ նախագահը, ինչպես ցանկացած այլ քաղաքական գործիչ, ունի իր վերաբերմունքը ընթացող քաղաքական զարգացումների վերաբերյալ: Այս մասին ապրիլի 25-ին լրագրողների հետ հանդիպմանն ասաց ԱԺ ՀՀԿ խմբակցության պատգամավոր Գագիկ Մինասյանը՝ անդրադառնալով ՀՀ երկրորդ նախագահ Ռոբերտ Քոչարյանի վերջին հարցազրույցին: «Ցանկացած քաղաքական գործիչ իր գնահատականները կարող է հնչեցնել քաղաքական զարգացումների վերաբերյալ, որոնք միշտ չէ, որ կարող են համընկնել Հանրապետական կուսակցության տեսակետների հետ»,- «Արմենպրես»-ի հաղորդմամբ, նշեց Մինասյանը:

Պատգամավորն ասաց, որ Ռոբերտ Քոչարյանի գնահատականներն ավելի շատ համընկնում են «Բարգավաճ Հայաստան» կուսակցության տեսակետների հետ: «Եթե դուք ուշադիր էիք, ապա սահմանադրական բարեփոխումների մասին լրատվության տարածումից հետո այդ հայեցակարգի վերաբերյալ «Բարգավաճ Հայաստան» կուսակցության դիրքորոշումը բառացիորեն կրկնում էր այն ձևակերպումները, որ տվեց երկրորդ նախագահը իր հայտնի հարցազրույցում»,- ընդգծեց պատգամավորը:

ՀՀ երկրորդ նախագահ Ռոբերտ Քոչարյանը 2.rd.am կայքին հարցազրույց էր տվել, որում անդրադարձել էր Հայաստանում սահմանադրական բարեփոխումների հայեցակարգին, ինչպես նաև մի շարք օրակարգային խնդիրների: Ռոբերտ Քոչարյանը, անդրադառնալով սահմանադրական բարեփոխումներին, նշել է, որ չկա երկրի առջև ծառացած ոչ մի կենսական խնդիր, որի լուծմանը խոչընդոտի գործող Սահմանադրությունը: Չկա նաև արտաքին ճնշում` պայմանավորված համընդհանուր ժողովրդավարական կանոններին Սահմանադրության ինչ-ինչ անհամապատասխանությամբ: