3 րոպեի ընթերցում
ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: ՀՀ ժողովրդական արտիստ Վլադիլեն Բալյանի համար ապրիլի 25-ը տոնական է, նա նշում է ծննդյան 90-ամյակը: «Արմենպրես»-ի թղթակցի հետ զրույցում կոմպոզիտորը պատմեց, որ պատրաստվում է նշել օրը ընտանիքի, բազմաթիվ հարազատների շրջապատում: «Տղաս է գալու իր ընտանիքի հետ, ինչպես նաև աղջիկս իր ընտանիքով: Երկու թոռներս Գերմանիայից նույնպես ներկա են գտնվելու, հավաքվելու ենք, նշելու»,- ասաց Բալյանը:
Նա խոստավանեց, որ վաղ առավոտից զանգերի պակաս չի զգացել: Նրան առաջինը շնորհավորողների թվում է եղել նաև ՀՀ մշակույթի նախարար Հասմիկ Պողոսյանը: «Առավոտ կանուխ զանգահարեց Հասմիկ Պողոսյանը, մենք հետաքրքիր ծրագրեր ունենք իրականացնելու: Նա շնորհավորեց ինձ և ասաց, որ պետք է այս տարի իրագործենք այդ ծրագրերը»,- նշեց Բալյանը:
Առաջիկա ծրագրերի թվում են նրա` Արամ Խաչատրյանի, Սվետոսլավ Ռիխտերի, Պավել Լիսիցյանի, երաժշտական ոլորտի այլ հեղինակավոր ներկայացուցիչների մասին կոմպոզիտորի արժեքավոր հուշերի տպագրությունը:
Մաեստրոն նաև մեծ ուրախությամբ սպասում է «Առաջին ալիքի»-ի «Երգ երգոց» հաղորդման ապրիլի 27-ի եթերին, որը նվիրված է լինելու իր ստեղծագործական գործունեությանը:Տարին Բալյանի համար հոբելյանական է լինելու, քանի որ ծրագրված են այլ միջոցառումներ ևս, որոնք հանդիսատեսին կրկին կներկայացնեն կոմպոզիտորի արվեստը և անցած ուղին:
Բալյանը ծնվել է 1924թ. ապրիլի 25-ին, Երևանում: Սովորել է Ռ.Մելիքյանիանվան երաժշտական ուսումնարանում, այնուհետև` ԵրևանիԿոմիտասի անվան պետական կոնսերվատորիայի դիրիժորական և խմբավարային ֆակուլտետներում: 1952-1954թթ եղել է ԼենինականիԿարա-Մուրզայիանվան երաժշտական ուսումնարանի տնօրենը: Եղել է Հայաստանի Ռադիոյի երաժշտական հաղորդումների առաջին գլխավոր խմբագիրը: 1955-61թթ ղեկավարել է Հայաստանի խորեոգրաֆիկ ուսումնարանը: 1964-65թթ եղել է Հայֆիլհարմոնիայի տնօրենը: 1966թ. ստեղծել էԱլ.Սպենդիարյանիանվան տուն-թանգարանը և մինչ 1972թ. եղել է տնօրենը: 1981թ-ից եղել է Հայաստանի ժողովրդական գործիքների համույթի ղեկավարը: Ստեղծագործել է տարբեր ժանրերում` սիմֆոնիկ, կամերային, երգչախմբային: Հեղինակել է բազմաթիվ երգեր: Հայաստանի Կոմպոզիտորների, Ժուռնալիստների, Մոսկվայի Հայերի միությունների անդամ է: «Հայաստան-Լիբանան» կազմակերպության նախագահն է: Պարգևատրվել է ՀՀ «Մովսես Խորենացի» մեդալով: Արժանացել է ՀՀ արվեստի վաստակավոր գործչի, 2011թ.` ՀՀ ժողովրդական արտիստի կոչմանը:
«Արմենպրես»-ի խմբագրակազմը սրտանց շնորհավորում է սիրելի մասեստրոյին` մաղթելով քաջ առողջություն և նորանոր ստեղծագործական ծրագրերի իրականացում: